م بکر بنت مسور کا بیان ہے کہ سیدنا حسن بن علی رضی اللہ عنہما کو کئی مرتبہ زہر دیا گیا، ہر مرتبہ اس کا اثر زائل ہو گیا، لیکن آخری مرتبہ جو زہر دیا گیا جس سے آپ کی شہادت واقع ہوئی وہ اس قدر سخت تھا کہ جگر کو کاٹ رہا تھا۔ جب ان کا انتقال ہو گیا تو بنی ہاشم کی عورتوں نے پورا ایک مہینہ ان کا افسوس کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4860]

ابوجعفر بیان کرتے ہیں کہ سیدنا حسن بن علی رضی اللہ عنہما کی شہادت پر ہر آنکھ اشکبار تھی اور (لوگوں نے آپ کے غم میں کئی روز تک) بازار بند رکھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4861]

سیدہ عائشہ بن سعد رضی اللہ عنہا بیان کرتی ہیں کہ سیدنا حسن بن علی رضی اللہ عنہما کی بیویوں نے پورا ایک سال سوگ منایا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4862]

سیدنا ثعلبہ بن ابی مالک فرماتے ہیں ” میں سیدنا حسن بن علی رضی اللہ عنہما کی شہادت کے وقت اور بقیع مبارک کے قبرستان میں اس کی تدفین کے وقت موجود تھا (وہاں لوگوں کا اس قدر ہجوم تھا کہ) اگر سوئی پھینک دی جاتی تو وہ بھی لوگوں کے سروں پر ہی رہتی۔ (اور نیچے نہ گرتی، کیونکہ نیچے گرنے کی کوئی گنجائش ہی نہیں تھی)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4863]

سیدنا محارب کا بیان ہے کہ سیدنا حسن بن علی رضی اللہ عنہما 40 دن کی شدید علالت کے بعد 50 ہجری، ماہ ربیع الاول میں اس دارفانی سے رحلت فرما گئے، اس وقت آپ کی عمر 46 سال تھی۔ سیدنا سعید بن العاص رضی اللہ عنہ نے اشکبار حالت میں ان کی نماز جنازہ پڑھائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4864]

ابواسحاق بیان کرتے ہیں کہ سیدنا علی رضی اللہ عنہ کی شہادت کے بعد کوفہ میں ابومحمد حسن بن علی رضی اللہ عنہما کی بیعت کی گئی۔ * حارثہ بن مضرب فرماتے ہیں کہ سیدنا حسن بن علی رضی اللہ عنہما نے بعیت لینے سے پہلے لوگوں سے کہا: خدا کی قسم! میں اس وقت تک تمہاری بیعت قبول نہیں کروں گا جب تک تم میری ایک شرط نہیں مانو گے۔ لوگوں نے پوچھا: آپ کی شرط کیا ہے؟ آپ نے فرمایا: یہ کہ تم اس سے صلح رکھو گے جس سے میری صلح ہو گی اور اس سے جنگ کرو گے جس سے میری جنگ ہو گی۔ جب آپ سب سے بیعت لے چکے تو آپ نے تمام لوگوں کو خطبہ دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4865]