سیدنا ابومخنف سے روایت ہے کہ جب سیدنا حسن بن علی رضی اللہ عنہما کی بیعت ہو گئی تو انہوں نے معاویہ (رضی اللہ عنہ) کے معاملے میں سختی اختیار کی اور ان کی جانب پیش قدمی کا ارادہ فرمایا، انہوں نے دس ہزار جنگجوؤں پر مشتمل ہراول دستے کی کمان عبداللہ بن جعفر طیار کے سپرد کی اور پھر ان کے پیچھے قیس بن سعد کو ایک عظیم لشکر کے ساتھ روانہ کیا، معاویہ نے عبداللہ بن جعفر کو پیغام بھیجا اور ان کے لیے دس لاکھ درہم کی ضمانت دی جس میں سے پانچ لاکھ درہم ان کے پاس پہنچنے پر اور پانچ لاکھ درہم حجاز پہنچنے پر ادا کیے جانے تھے، وہ اس پیشکش پر راضی ہو گئے اور اپنا راستہ چھوڑ کر معاویہ کی جانب چلے گئے جنہوں نے اپنا وعدہ پورا کیا، اس سے لشکر تتر بتر ہو گیا مگر قیس بن سعد اپنی ثابت قدمی پر قائم رہے اور عبداللہ بن جعفر کے ساتھیوں میں سے بہت سے لوگ قیس بن سعد کے ساتھ شامل ہو گئے، معاویہ نے قیس کو بھی پیغامات بھیجے اور انہیں لالچ دیا مگر وہ اپنی جگہ سے نہ ہلے یہاں تک کہ سیدنا حسن رضی اللہ عنہ نے معاویہ سے صلح کر لی اور اقتدار ان کے سپرد کر دیا، جب سیدنا حسن اور ان کے ساتھی معاویہ سے ملاقات کے لیے روانہ ہوئے تو ساباط کے تاریک مقام پر سیدنا حسن پر اچانک قاتلانہ حملہ ہوا، انہیں بنو نصر بن قعین کے ایک شخص سنان بن جراح اسدی نے، جو خارجی نظریات رکھتا تھا، ران پر کدال (بسولے) سے نہایت گہرا اور برا زخم لگایا، سیدنا حسن نے اسے پکڑ لیا اور دونوں زمین پر آ گرے، تب عبداللہ بن اخطل قاری نے لپک کر جراح کے ہاتھ سے کدال چھین کر اسی سے اسے مارا، پھر عبداللہ بن طبیان بن عمارہ تمیمی نے اس کے چہرے کو کاٹا یہاں تک کہ اس کی ناک کٹ گئی اور پتھر سے اس کا سر کچل دیا جس سے وہ وہیں ڈھیر ہو گیا، پس ہلاکت ہے ان بدبختوں کے لیے، سیدنا حسن کو چارپائی پر اٹھا کر مدائن لایا گیا جہاں وہ مختار کے چچا سعد بن مسعود ثقفی کے ہاں ٹھہرے جو سیدنا علی رضی اللہ عنہ کی جانب سے مدائن کے گورنر تھے، انہوں نے طبیب کا انتظام کیا جس نے آپ کا علاج کیا یہاں تک کہ آپ تندرست ہو گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4867]