سیدنا علی رضی اللہ عنہ سے مروی ہے کہ رسول اللہ صلی اللہ علیہ وسلم نے سیدہ فاطمہ رضی اللہ عنہا کو فرمایا: حسین رضی اللہ عنہ کے بالوں کا وزن کر کے اس کے برابر چاندی صدقہ کر دو اور آیا (دائی) کو (کم از کم) عقیقہ کے جانور کا کھر دے دینا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4888]

سیدنا ام الفضل رضی اللہ عنہا فرماتی ہیں: میرے پاس رسول اللہ صلی اللہ علیہ وسلم تشریف لائے، میں اس وقت سیدنا حسین رضی اللہ عنہ کو اپنے بیٹے (جس کا نام قثم تھا) کے حصے کا دودھ پلا رہی تھی، رسول اللہ صلی اللہ علیہ وسلم نے مجھ سے حسین کو مانگا، میں نے سیدنا حسین رضی اللہ عنہ کو آپ کی گود میں دے دیا، سیدنا حسین رضی اللہ عنہ نے آپ علیہ السلام پر پیشاب کر دیا، میں نے اپنے ہاتھ ان کی جانب بڑھائے (تاکہ حسین رضی اللہ عنہ کو میں لے لوں لیکن) حضور صلی اللہ علیہ وسلم نے فرمایا: میرے بیٹے کو مجھ سے جدا مت کرو، آپ فرماتی ہیں: حضور صلی اللہ علیہ وسلم نے اس پر پانی چھڑک دیا۔ سیدنا عبداللہ بن عباس رضی اللہ عنہما فرماتے ہیں: دودھ پیتے لڑکے کے پیشاب پر پانی کے چھینٹے مارے جائیں گے جبکہ اسی عمر کی لڑکی کے پیشاب کو دھویا جائے گا۔ ٭٭ یہ حدیث متعدد سندوں کے ہمراہ مروی ہے لیکن اس کے باوجود امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ تاہم اسماعیل بن عیاش اور عطاء بن عجلان کی روایات شیخین رحمۃ اللہ علیہما نے نقل نہیں کیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4889]