سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے سیدہ فاطمہ رضی اللہ عنہا کو حکم دیتے ہوئے فرمایا: ”حسین کے بالوں کے وزن کے برابر چاندی صدقہ کرو، اور دائی کو عقیقے کے جانور کی ایک ران دے دو۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4888]

ام الفضل رضی اللہ عنہا سے روایت ہے، انہوں نے کہا کہ رسول اللہ صلی اللہ علیہ وسلم میرے پاس تشریف لائے جبکہ میں حسین بن علی کو اپنے بیٹے قثم کے دودھ پر دودھ پلا رہی تھی، آپ صلی اللہ علیہ وسلم نے انہیں (گود میں) لے لیا تو انہوں نے آپ صلی اللہ علیہ وسلم پر پیشاب کر دیا، میں نے اپنا ہاتھ ان کی طرف بڑھایا (تاکہ انہیں ہٹاؤں) تو رسول اللہ صلی اللہ علیہ وسلم نے فرمایا: ”میرے بیٹے کا پیشاب نہ رکواؤ“، پھر آپ صلی اللہ علیہ وسلم نے اس پر پانی کے چھینٹے مارے۔ ابن عباس رضی اللہ عنہما فرماتے ہیں: دودھ پیتے لڑکے کے پیشاب پر پانی چھڑکا جاتا ہے اور لڑکی کے پیشاب کو دھویا جاتا ہے۔
یہ حدیث مختلف اسناد سے مروی ہے لیکن شیخین نے اسے روایت نہیں کیا، جبکہ اسماعیل بن عیاش اور عطاء بن عجلان کو انہوں نے اپنی کتابوں میں جگہ نہیں دی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4889]