ابوعبداللہ الاشہلی کے بھائی محمود بن لبید بیان کرتے ہیں: جب ابوالحیسر انس بن رافع مکہ میں آیا، اس کے ہمراہ بنی عبدالاشہل کے کچھ نوجوان تھے، ان میں ایاس بن معاذ بھی تھے، یہ لوگ خزرج کو اپنی قوم کے خلاف اپنا حلیف بنانے کی غرض سے آئے تھے، رسول اللہ صلی اللہ علیہ وسلم کو ان کی آمد کا پتہ چلا تو آپ خود ان کے پاس تشریف لے آئے اور ان کے پاس بیٹھ گئے اور فرمایا: کیا تم یہاں جس مقصد کی خاطر آئے ہو، کیا تمہیں ایسی بھلائی میں کوئی دلچسپی ہے جو اس سے بھی بہتر ہے؟ انہوں نے پوچھا وہ کیا ہے؟ آپ صلی اللہ علیہ وسلم نے فرمایا: میں اللہ تعالیٰ کا رسول ہوں، اس نے مجھے بندوں کی جانب مبعوث فرمایا ہے تاکہ میں ان کو اللہ تعالیٰ کی عبادت کی طرف بلاؤں اور ان کو شرک کرنے سے روکوں اور اس نے مجھ پر کتاب نازل فرمائی ہے۔ پھر آپ صلی اللہ علیہ وسلم نے ان کو اسلام کی تعلیمات سے آگاہ کیا اور ان کو قرآن کریم کی تلاوت سنائی۔ ایاس بن معاذ نوجوان تھے، بولے: اے میری قوم! تم جس مقصد کی خاطر آئے ہو اس کے حصول سے زیادہ بہتر یہ ہے۔ (یہ سنتے ہی) ابوالحیسر نے (غصے میں آ کر) زمین سے ایک مٹھی مٹی اٹھا کر سیدنا ایاس رضی اللہ عنہ کے منہ پر ماری اور کہنے لگا: ہمیں اس کی ضرورت نہیں ہے، ہم کسی اور مقصد کی خاطر آئے ہیں۔ لیکن سیدنا ایاس رضی اللہ عنہ جواباً خاموش رہے۔ رسول اللہ صلی اللہ علیہ وسلم وہاں سے اٹھ کر مدینہ میں تشریف لے آئے۔ پھر اوس اور خزرج (دونوں قبیلوں) کے درمیان بعاث والا واقعہ رونما ہو گیا، اس کے کچھ ہی دنوں بعد سیدنا ایاس رضی اللہ عنہ کا انتقال ہو گیا۔ محمود بن لبید کہتے ہیں: ان کی وفات کے وقت جو لوگ وہاں موجود تھے، انہوں نے مجھے یہ بات بتائی ہے کہ روح نکلنے تک سیدنا ایاس رضی اللہ عنہ مسلسل اللہ تعالیٰ کی تکبیر، تسبیح و تحمید کرتے رہے۔ آپ فرماتے ہیں: صحابہ کرام رضی اللہ عنہم کو اس بات پر یقین تھا کہ ان کا خاتمہ اسلام پر ہوا ہے۔ اس مجلس میں جب انہوں نے رسول اللہ صلی اللہ علیہ وسلم کی گفتگو سنی تھی تو اسی وقت ان کو اسلام کا شعور آ گیا تھا۔ (اور وہ مسلمان ہو گئے تھے) ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4891]

سیدنا یحیی بن عبداللہ بن ابی قتادہ اپنے والد سے وہ ان کے دادا سے روایت کرتے ہیں کہ سیدنا براء بن معرور رضی اللہ عنہ رسول اللہ صلی اللہ علیہ وسلم کے مدینہ تشریف لانے سے ایک مہینہ پہلے ماہ صفر المظفر میں انتقال کر گئے تھے۔ اور یہ نقباء صحابہ میں سب سے پہلے صحابی ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4892]