سیدنا عفیف بن عمرو رضی اللہ عنہ فرماتے ہیں کہ میں تاجر شخص تھا اور زمانہ جاہلیت میں سیدنا عباس بن عبدالمطلب رضی اللہ عنہ کا دوست تھا، میں ایک مرتبہ تجارت کی غرض سے آیا ہوا تھا اور منی میں سیدنا عباس بن عبدالمطلب رضی اللہ عنہ کے پاس بیٹھا ہوا تھا، اسی اثناء میں ایک آدمی آیا، اور جب سورج ڈھل گیا تو نماز پڑھنے لگ گیا، پھر ایک عورت آئی اور وہ بھی نماز میں مشغول ہو گئی، اس کے بعد ایک قریب البلوغ بچہ آیا اور وہ بھی نماز پڑھنے لگ گیا۔ میں نے سیدنا عباس رضی اللہ عنہ سے پوچھا کہ یہ کون لوگ ہیں؟ انہوں نے بتایا کہ یہ میرا چچا زاد بھائی محمد بن عبداللہ بن عبدالمطلب ہے، یہ اپنے آپ کو نبی سمجھتا ہے، اور ابھی تک اس عورت اور بچے کے علاوہ کسی نے بھی اس کی پیروی اختیار نہیں کی ہے۔ اور یہ عورت اس کی بیوی خدیجہ بنت خویلد رضی اللہ عنہا ہے اور یہ لڑکا اس کا چچا زاد بھائی علی بن ابی طالب رضی اللہ عنہ ہے۔ بعد میں سیدنا عفیف الکندی ایمان لے آئے تھے، آپ فرمایا کرتے تھے، کاش کہ میں اس دن ایمان لے آتا تو میں چوتھا مسلمان ہوتا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ سیدنا عفیف بن عمرو الکندی کی اولاد امجاد کی سند کے ہمراہ مروی ایک حدیث مذکورہ حدیث کی شاہد ہے۔ جو کہ درج ذیل ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4902]

ام المومنین سیدہ عائشہ صدیقہ رضی اللہ عنہا ارشاد فرماتی ہیں کہ نبی اکرم صلی اللہ علیہ وسلم پر وحی کا آغاز سچی خوابوں کے ذریعے ہوا، آپ جو خواب بھی دیکھتے وہ پورا ہو جاتا تھا، پھر آپ کے دل میں گوشہ نشینی کی محبت ڈال دی گئی، آپ غار حراء میں تشریف لے جاتے اور کئی کئی راتیں وہاں پر عبادت الہی میں مشغول رہتے، حتی کہ اسی غار میں فرشتہ آپ کے پاس آیا، اس نے کہا: پڑھئے! میں نے کہا: میں نہیں پڑھوں گا۔ اس نے مجھے پکڑ کر سینے سے لگا کر زور سے دبایا، جب مجھے تکلیف محسوس ہونے لگی تو اس نے مجھے چھوڑ دیا، پھر کہا: پڑھئے: اِقْرَأْ بِاسْمِ رَبِّکَ الَّذِیْ خَلَقَ خَلَقَ الْاِنْسَانَ مِنْ عَلَقٍ اِقْرَأْ وَرَبُّکَ الْاَکْرَمُ الَّذِی عَلَّمَ بِالْقَلَمِ عَلَّمَ الْاِنْسَانَ مَا لَمْ یَعْلَم (العلق: 1 ـ 4) ” پڑھو اپنے رب کے نام سے جس نے پیدا کیا آدمی کو خون کی پھٹک سے بنایا پڑھو اور تمہارا رب ہی سب سے بڑا کریم جس نے قلم سے لکھنا سکھایا آدمی کو سکھایا جو نہ جانتاتھا “ آپ وہاں سے کانپتے ہوئے واپس سیدہ خدیجہ رضی اللہ عنہا کے پاس تشریف لائے، اور فرمایا: مجھے کمبل اوڑھا دو، مجھے کمبل اوڑھا دو، اہل خانہ نے آپ صلی اللہ علیہ وسلم کو کمبل اوڑھا دیا، آہستہ آہستہ آپ کی وہ کیفیت ختم ہو گئی تو آپ صلی اللہ علیہ وسلم نے سیدہ خدیجہ رضی اللہ عنہا سے کہا: میرے قریب آؤ، پھر حضور صلی اللہ علیہ وسلم نے ان کو تمام واقعہ سنایا، اور فرمایا: مجھے تو اپنے آپ پر خوف آ رہا ہے۔ ام المومنین سیدہ خدیجہ رضی اللہ عنہا نے کہا: ہرگز نہیں، بلکہ آپ کو تو خوش ہونا چاہئے، خدا کی قسم اللہ تعالیٰ آپ کو کبھی رسوا نہیں کرے گا۔ آپ صلہ رحمی کرتے ہیں، سچ بولتے ہیں، مشکل میں لوگوں کے کام آتے ہیں، مہمان نوازی کرتے ہیں، لوگوں کی حاجت روائی کرتے ہیں۔ پھر سیدہ خدیجہ رضی اللہ عنہا حضور صلی اللہ علیہ وسلم کو اپنے ہمراہ اپنے چچا زاد بھائی سیدنا ورقہ بن نوفل بن اسد بن عبدالعزی بن قصی رضی اللہ عنہ کے پاس لے گئیں۔ ورقہ بن نوفل زمانہ جاہلیت میں نصرانی مذہب پر عمل پیرا تھے، آپ عربی لکھنا پڑھنا جانتے تھے اور انجیل مقدس کا عربی میں ترجمہ بھی کیا کرتے تھے۔ یہ کافی بوڑھے تھے اور اس وقت ان کی بینائی بھی جواب دے چکی تھی۔ ام المومنین سیدہ خدیجہ رضی اللہ عنہا نے ورقہ بن نوفل سے کہا: اے میرے چچا کے بیٹے! ذرا اپنے بھتیجے کی بات غور سے سنئے۔ سیدنا ورقہ بن نوفل رضی اللہ عنہ نے کہا: اے میرے بھتیجے! تم نے کیا دیکھا ہے؟ تو رسول اللہ صلی اللہ علیہ وسلم نے جو کچھ دیکھا تھا سب کہہ سنایا۔ تو سیدنا ورقہ بن نوفل رضی اللہ عنہ نے کہا: یہ وہی فرشتہ ہے جو سیدنا موسیٰ علیہ السلام پر نازل ہوا کرتا تھا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4903]

امام زہری فرماتے ہیں: عورتوں میں سب سے پہلے سیدہ خدیجہ رضی اللہ عنہا رسول اللہ صلی اللہ علیہ وسلم پر ایمان لائی تھیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4904]