سیدنا محمد بن عمر رضی اللہ عنہ فرماتے ہیں کہ رسول اللہ صلی اللہ علیہ وسلم (ہجرت کے بعد) سب سے پہلا علم سیدنا حمزہ بن عبدالمطلب رضی اللہ عنہ کو دیا، ان کے بعد سیدنا عبیدہ بن حارث بن عبدالمطلب رضی اللہ عنہ کو دیا (یہ اس علم کو ساتھ لے کر) مقام جحفہ اور مقام قدید کے درمیان بطن رابغ تک گئے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4922]

سیدنا عبداللہ بن عباس رضی اللہ عنہما سے وہ حدیث مروی ہے جس میں قتال طلبی کا تذکرہ ہے۔ اور یہ بھی کہ عتبہ بن ربیعہ نے سیدنا عبیدہ بن الحارث کو شہید کیا۔ مبازرت (جنگ کے لئے پکارنے) کے بعد عتبہ نے سیدنا عبیدہ کی پنڈلی پر کاری ضرب لگائی، جس سے ان کی پنڈلی کٹ گئی۔ رسول اللہ صلی اللہ علیہ وسلم نے ان کو میدان جنگ سے اٹھوا لیا۔ پھر جنگ بدر ختم ہونے کے بعد جب صحابہ کرام رضی اللہ عنہم واپس لوٹے تو مقام صفراء میں ان کا انتقال ہو گیا، اور ان کو وہیں دفن کر دیا گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4923]