ام مبشر رضی اللہ عنہا سے روایت ہے کہ میں رسول اللہ صلی اللہ علیہ وسلم کی خدمت میں اس مرض کے دوران حاضر ہوئی جس میں آپ صلی اللہ علیہ وسلم کی وفات ہوئی، میں نے عرض کی: ”اے اللہ کے رسول! میرے ماں باپ آپ پر قربان، آپ اپنی اس تکلیف کے بارے میں کیا محسوس فرماتے ہیں؟ کیونکہ میں اپنے بیٹے کے متعلق اسی زہریلے کھانے کو اس کی موت کا سبب سمجھتی ہوں جو اس نے آپ کے ساتھ خیبر میں کھایا تھا،“ اور ان کے بیٹے بشر بن براء بن معرور نبی کریم صلی اللہ علیہ وسلم کی وفات سے پہلے انتقال کر گئے تھے، تو رسول اللہ صلی اللہ علیہ وسلم نے فرمایا: ”اور میں بھی اس کے علاوہ کسی اور چیز کو (اپنی تکلیف کا) سبب نہیں سمجھتا، یہ میری شہ رگ کے کٹ جانے کا وقت ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5032]