سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”قرآن ان چار افراد سے سیکھو: عبداللہ بن مسعود سے، معاذ سے، ابی (بن کعب) سے اور سالم مولیٰ ابوحذیفہ سے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5069]

محمد بن عمر اپنے اساتذہ سے روایت کرتے ہیں کہ سیدنا ابوحذیفہ کے آزاد کردہ غلام سالم رضی اللہ عنہ دراصل ایک انصاری خاتون ثبیتہ بنت یعار کے غلام تھے، جو ابوحذیفہ رضی اللہ عنہ کی زوجیت میں تھیں تو ابوحذیفہ نے انہیں گود لے لیا تھا، چنانچہ انہیں سالم بن ابوحذیفہ کہا جاتا تھا، لیکن جب قرآن کی یہ آیت نازل ہوئی ﴿ادْعُوهُمْ لِآبَائِهِمْ﴾ [سورة الأحزاب: 5] ”انہیں ان کے اصل باپوں کے نام سے پکارو“ تو انہیں سالم مولیٰ ابوحذیفہ کہا جانے لگا۔ وہ سن 12 ہجری میں جنگِ یمامہ میں شہید ہوئے، اور میدانِ جنگ میں ان کا سر ابوحذیفہ کے قدموں کے پاس، یا ابوحذیفہ کے قدم ان کے سر کے پاس پائے گئے۔ موسیٰ بن عقبہ کہتے ہیں کہ ان کا اصل نام سالم بن معقل تھا اور ان کا تعلق اصطخر (فارس) سے تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5070]