سیدنا عبداللہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: چار آدمیوں سے قرآن حاصل کیا کرو۔ عبداللہ بن مسعود رضی اللہ عنہ سے۔ سیدنا معاذ رضی اللہ عنہ سے۔ سیدنا ابی (بن کعب) رضی اللہ عنہ۔ اور ابوحذیفہ کے آزاد کردہ غلام سیدنا سالم رضی اللہ عنہ سے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5069]

محمد بن عمر اپنے شیوخ کے حوالے سے بیان کرتے ہیں کہ ابوحذیفہ بن عتبہ کے آزاد کردہ غلام سیدنا سالم رضی اللہ عنہ، ثبیتہ بنت یعار انصاریہ کے غلام تھے اور ثبیتہ انصاریہ سیدنا ابوحذیفہ رضی اللہ عنہ کے نکاح میں تھیں، تو سیدنا ابوحذیفہ رضی اللہ عنہ نے ان کو اپنا منہ بولا بیٹا بنا لیا تھا۔ اس لئے ان کو سالم بن ابی حذیفہ کہہ کر ہی بلایا جاتا تھا۔ پھر جب قرآن اکرم کی یہ آیت نازل ہوئی۔ ادعوھم لآبائھم (الاحزاب: 5) ” انہیں ان کے باپ ہی کا کہہ کر پکارو “۔ تو ان کو سالم مولی حذیفہ کہا جانے لگا۔ آپ بارہویں سن ہجری میں جنگ یمامہ میں شہید ہوئے ان کا سر سیدنا ابوحذیفہ کے پاؤں کے قریب پڑا ہوا ملا تھا، یا (شاید یہ الفاظ ہیں کہ) ابوحذیفہ کے پاؤں، ان کے سر کے پاس تھے۔ اور موسیٰ بن عتبہ کا کہنا ہے کہ وہ سالم بن معقل ہے اہل اصطخر میں سے ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5070]