سیدہ عائشہ رضی اللہ عنہا سے روایت ہے کہ ایک رات میں نے عشاء کے بعد رسول اللہ صلی اللہ علیہ وسلم کے پاس حاضر ہونے میں کچھ دیر کر دی، جب میں آئی تو آپ صلی اللہ علیہ وسلم نے مجھ سے دریافت فرمایا: ”تم کہاں تھیں؟“ میں نے عرض کیا: میں مسجد میں آپ کے صحابہ میں سے ایک صاحب کی قراءت سن رہی تھی، میں نے ان جیسی خوش الحان آواز اور قراءت آپ کے صحابہ میں سے کسی اور سے نہیں سنی۔ پس آپ صلی اللہ علیہ وسلم کھڑے ہوئے اور میں بھی آپ کے ہمراہ چلی یہاں تک کہ آپ نے ان کی قراءت سماعت فرمائی، پھر میری طرف رخ کر کے فرمایا: ”یہ سالم مولیٰ ابوحذیفہ ہیں، اللہ کا شکر ہے جس نے میری امت میں ان جیسا صاحبِ کمال پیدا فرمایا۔“
یہ حدیث شیخین کی شرط پر صحیح ہے لیکن انہوں نے اسے ان الفاظ کے ساتھ روایت نہیں کیا، البتہ انہوں نے عبید اللہ کی نافع سے اور ان کی سیدنا ابن عمر رضی اللہ عنہما سے اس روایت پر اتفاق کیا ہے کہ جب مہاجرین مکہ سے مدینہ منورہ پہنچے تو مقامِ قباء میں سالم مولیٰ ابوحذیفہ ان کی امامت کرتے تھے کیونکہ وہ سب سے زیادہ علمِ قرآن کے حامل تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5071]

سیدہ عائشہ رضی اللہ عنہا سے روایت ہے کہ سیدنا ابوحذیفہ رضی اللہ عنہ کی زوجہ نے رسول اللہ صلی اللہ علیہ وسلم سے سالم مولیٰ ابوحذیفہ کے (گود لیے ہوئے بیٹے کی حیثیت سے) اپنے پاس بے تکلف آنے جانے کا تذکرہ کیا (جبکہ وہ بالغ ہو چکے تھے)، تو رسول اللہ صلی اللہ علیہ وسلم نے ان سے فرمایا: ”تم انہیں دودھ پلا دو“، چنانچہ انہوں نے سالم کے غزوہ بدر میں شریک ہونے کے بعد انہیں دودھ پلایا (تاکہ حرمتِ رضاعت قائم ہو سکے) اور پھر وہ ان کے پاس بلا جھجھک آیا جایا کرتے تھے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5072]