سیدہ عائشہ رضی اللہ عنہا سے روایت ہے کہ جب اہل مکہ نے اپنے قیدیوں کے فدیہ کے لیے مال بھیجا تو رسول اللہ صلی اللہ علیہ وسلم کی صاحبزادی سیدہ زینب رضی اللہ عنہا نے ابوالعاص کے فدیہ کے طور پر کچھ مال بھیجا، اس مال میں وہ ہار بھی شامل تھا جو سیدہ خدیجہ رضی اللہ عنہا نے اپنی بیٹی زینب کو ابوالعاص کے گھر رخصتی کے وقت دیا تھا۔ جب رسول اللہ صلی اللہ علیہ وسلم نے وہ ہار دیکھا تو آپ صلی اللہ علیہ وسلم پر شدید رقت طاری ہو گئی اور آپ صلی اللہ علیہ وسلم نے صحابہ سے فرمایا: ”اگر تم مناسب سمجھو تو ان کے قیدی کو رہا کر دو اور ان کا مال انہیں واپس کر دو۔“ صحابہ نے عرض کیا: جی ہاں اے اللہ کے رسول! چنانچہ انہوں نے انہیں رہا کر دیا اور ان کا مال واپس کر دیا۔ ابوالعاص مسلسل اپنے شرک پر قائم رہے یہاں تک کہ فتح مکہ سے کچھ عرصہ پہلے وہ قریش کا مالِ تجارت لے کر شام گئے، جب وہ اپنی تجارت سے فارغ ہو کر واپس لوٹے تو رسول اللہ صلی اللہ علیہ وسلم کے ایک فوجی دستے (سریہ) سے ان کا سامنا ہوا۔ کہا جاتا ہے کہ رسول اللہ صلی اللہ علیہ وسلم نے خود اس قافلے کی طرف دستہ روانہ کیا تھا جس میں ابوالعاص شام سے واپس آ رہے تھے، اس دستے میں ایک سو ستر سوار تھے جن کے امیر زید بن حارثہ رضی اللہ عنہ تھے، یہ واقعہ جمادی الاولیٰ سن 6 ہجری کا ہے۔ پس انہوں نے اس قافلے کا تمام سامان قبضے میں لے لیا اور کچھ لوگوں کو قیدی بنا لیا، مگر ابوالعاص بھاگ نکلنے میں کامیاب ہو گئے، جب یہ لشکر مالِ غنیمت لے کر پہنچا تو ابوالعاص رات کے وقت آئے اور رسول اللہ صلی اللہ علیہ وسلم کی صاحبزادی سیدہ زینب رضی اللہ عنہا کے پاس پہنچ کر پناہ مانگی تو انہوں نے انہیں پناہ دے دی تاکہ وہ اپنا مال واپس لے سکیں۔ جب رسول اللہ صلی اللہ علیہ وسلم صبح کی نماز کے لیے نکلے اور آپ صلی اللہ علیہ وسلم نے تکبیر کہی اور لوگوں نے بھی آپ کے ساتھ تکبیر کہی تو ایک آواز آئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5109]

سیدہ عائشہ رضی اللہ عنہا بیان کرتی ہیں کہ سیدہ زینب رضی اللہ عنہا نے بلند آواز سے پکارا: اے لوگو! میں نے ابوالعاص بن ربیع کو پناہ دے دی ہے۔ جب رسول اللہ صلی اللہ علیہ وسلم نے نماز سے سلام پھیرا تو لوگوں کی طرف متوجہ ہوئے اور فرمایا: ”اے لوگو! کیا تم نے وہ سنا جو میں نے سنا؟“ لوگوں نے عرض کیا: جی ہاں، آپ صلی اللہ علیہ وسلم نے فرمایا: ”اس ذات کی قسم جس کے ہاتھ میں محمد کی جان ہے! مجھے اس بارے میں کچھ علم نہیں تھا یہاں تک کہ میں نے بھی وہی سنا جو تم نے سنا، بے شک مسلمانوں کا ایک ادنیٰ درجہ کا آدمی بھی کسی کو پناہ دے سکتا ہے۔“ پھر رسول اللہ صلی اللہ علیہ وسلم وہاں سے اپنی صاحبزادی سیدہ زینب رضی اللہ عنہا کے پاس تشریف لے گئے اور فرمایا: ”اے پیاری بیٹی! ان کی ٹھہرنے کی جگہ کو باعزت بنانا (یعنی ان کی مہمان نوازی کرنا) لیکن وہ تمہارے قریب (بطور شوہر) نہ آئیں کیونکہ اب تم ان کے لیے حلال نہیں ہو۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5110]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے اس فوجی دستے (سریہ) کی طرف پیغام بھیجا جنہوں نے ابوالعاص کا مال قبضے میں لیا تھا اور ان سے فرمایا: ”یہ شخص ہمارے متعلقین میں سے ہے جیسا کہ تم جانتے ہو، اور تم نے اس کا مال حاصل کر لیا ہے، پس اگر تم بھلائی کرو اور اس کا مال اسے واپس لوٹا دو تو ہمیں یہ بات پسند ہے، لیکن اگر تم اسے واپس کرنے سے انکار کرو تو یہ اللہ کی طرف سے دیا گیا وہ مالِ فے ہے جو اس نے تمہیں عطا فرمایا ہے اور تم اس کے زیادہ حقدار ہو۔“ صحابہ نے عرض کیا: اے اللہ کے رسول! ہم اسے اس کا مال واپس کر دیں گے۔ راوی کہتے ہیں کہ انہوں نے اس کا سارا مال واپس کر دیا یہاں تک کہ جس کے پاس کوئی رسی تھی وہ رسی لے آیا، جس کے پاس چمڑے کا پرانا مشکیزہ یا پانی کا برتن تھا وہ لے آیا، یہاں تک کہ کوئی لکڑی کی کیل (جو کجاوے میں استعمال ہوتی ہے) لے کر آیا، یہاں تک کہ انہوں نے اس کا مکمل مال واپس کر دیا اور اس میں سے ذرہ برابر بھی کوئی چیز ضائع نہ ہوئی۔ پھر وہ مکہ روانہ ہوئے اور قریش کے ہر اس صاحبِ مال کو اس کا مال پہنچا دیا جس نے ان کے ساتھ تجارت کے لیے سامان بھیجا تھا، پھر ابوالعاص نے پکار کر کہا: ”اے گروہِ قریش! کیا تم میں سے کسی کا کوئی مال میرے پاس باقی ہے جو اسے نہ ملا ہو؟“ انہوں نے کہا: نہیں، اللہ تمہیں بہترین جزا دے، ہم نے تمہیں عہد کا پکا اور نہایت شریف پایا ہے، تب انہوں نے کہا: ”میں گواہی دیتا ہوں کہ اللہ کے سوا کوئی معبودِ برحق نہیں اور محمد صلی اللہ علیہ وسلم اللہ کے بندے اور اس کے رسول ہیں، اور مجھے تمہارے پاس مکہ میں اسلام لانے سے صرف یہ ڈر مانع تھا کہ کہیں تم یہ نہ سمجھو کہ میں تمہارا مال مارنا چاہتا ہوں، اب جبکہ اللہ نے وہ مال تمہیں ادا کروا دیا اور میں اس ذمہ داری سے فارغ ہو گیا تو اب میں اسلام لاتا ہوں“، پھر وہ وہاں سے ہجرت کر کے رسول اللہ صلی اللہ علیہ وسلم کی خدمت میں حاضر ہو گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5111]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے اپنی صاحبزادی سیدہ زینب رضی اللہ عنہا کو پہلے ہی نکاح کی بنیاد پر (ابوالعاص کے پاس) واپس لوٹا دیا اور چھ سال گزر جانے کے بعد بھی کوئی نیا نکاح نہیں پڑھایا۔ پھر ابوالعاص اسلام لانے کے بعد (اپنے معاملات درست کرنے) مکہ واپس چلے گئے تھے اس لیے وہ نبی کریم صلی اللہ علیہ وسلم کے ہمراہ کسی جنگ میں شریک نہیں ہوئے، پھر اس کے بعد وہ مدینہ منورہ آگئے اور سیدنا ابوبکر صدیق رضی اللہ عنہ کے دورِ خلافت میں سن 12 ہجری کے ماہِ ذی الحجہ میں ان کا انتقال ہوا اور انہوں نے سیدنا زبیر بن عوام رضی اللہ عنہ کو اپنی وصیتوں کے لیے وصی مقرر کیا تھا۔
سیدنا ضرار بن ازور اسدی شاعر رضی اللہ عنہ کے مناقب کا ذکر: [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5112]