ام المومنین سیدہ عائشہ رضی اللہ عنہا فرماتی ہیں: جب اہل مکہ نے اپنے قیدیوں کے فدیے بھیجے، تو رسول اللہ صلی اللہ علیہ وسلم کی صاحبزادی سیدہ زینب رضی اللہ عنہا نے اپنے شوہر سیدنا ابوالعاص رضی اللہ عنہ کے فدیے کی مد میں مال بھیجا، اس مال میں وہ ہار بھی تھا جو ان کی والدہ محترمہ سیدہ خدیجہ رضی اللہ عنہا نے سیدنا ابوالعاص رضی اللہ عنہ کے ساتھ نکاح کے موقع پر ان کو پہنایا تھا، جب رسول اللہ صلی اللہ علیہ وسلم نے وہ ہار دیکھا تو آپ پر رقت طاری ہو گئی، آپ بہت روئے، آپ صلی اللہ علیہ وسلم نے (صحابہ سے مخاطب ہو کر) فرمایا: اگر تم (مناسب سمجھو تو) زینب کے قیدی کو رہا کر دو، اور اس نے فدیے میں جو مال بھیجا ہے وہ واپس لوٹا دو۔ صحابہ کرام رضی اللہ عنہم نے اس بات کو دل و جان سے قبول کر لیا، اور سیدنا ابوالعاص رضی اللہ عنہ کو رہا کر دیا اور سیدہ زینب رضی اللہ عنہ کا بھیجا ہوا مال واپس کر دیا، اس کے بعد بھی سیدنا ابوالعاص رضی اللہ عنہ حالت شرک پر ہی قائم رہے، فتح مکہ سے کچھ عرصہ پہلے سیدنا ابوالعاص رضی اللہ عنہ قریش مکہ کا سامان تجارت لے کر ملک شام گئے، جب تجارت سے فارغ ہو کر واپس آ رہے تھے، تو رسول اللہ صلی اللہ علیہ وسلم کے ایک لشکر کی جماعت کی ان سے ملاقات ہوئی، (یہ بھی کہا گیا ہے کہ اس لشکر کو رسول اللہ صلی اللہ علیہ وسلم نے بذات خود اسی قافلے سے ملاقات کے لئے روانہ کیا تھا، جو شام سے واپس آ رہا تھا اور اس میں ابوالعاص بھی تھے، یہ لشکر 170 مجاہدین پر مشتمل تھا اور ان کے امیر سیدنا زید بن حارثہ رضی اللہ عنہ تھے، (یہ بات جمادی الاولی چھٹی سن ہجری کی ہے) اس لشکر نے اس قافلے والوں کا مال چھین لیا اور ان کو گرفتار کر لیا، لیکن ابوالعاص رضی اللہ عنہ ان کے ہاتھ نہ آئے، جب یہ لشکر واپس آ گیا، ابوالعاص رضی اللہ عنہ اپنا مال لینے کے لئے، رسول اللہ صلی اللہ علیہ وسلم کی صاحبزادی سیدہ زینب رضی اللہ عنہا کے پاس آئے، اور ان سے پناہ مانگی، سیدہ زینب رضی اللہ عنہا نے ان کو پناہ دے دی، پھر جب رسول اللہ صلی اللہ علیہ وسلم نماز فجر کے لئے نکلے اور (نماز کے لئے) تکبیر کہی، تو تمام لوگوں نے بھی آپ صلی اللہ علیہ وسلم کے ہمراہ تکبیر کہی [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5109]

ام المومنین سیدہ عائشہ رضی اللہ عنہا بیان کرتی ہیں: جب اہل مکہ نے اپنے قیدیوں کا فدیہ بھجوایا تو نبی اکرم صلی اللہ علیہ وسلم کی صاحبزادی سیدہ زینب رضی اللہ عنہا نے (اپنے شوہر) ابوالعاص کے فدیے کے طور پر کچھ مال بھجوایا، جس میں انہوں نے وہ ہار بھی بھجوا دیا، جو سیدہ خدیجہ رضی اللہ عنہا نے سیدہ زینب رضی اللہ عنہا کی رخصتی کے موقع پر انہیں دیا تھا، جب نبی اکرم صلی اللہ علیہ وسلم نے وہ ہار ملاحظہ فرمایا تو آپ پر شدید رقت طاری ہو گئی۔ ام المومنین سیدہ عائشہ رضی اللہ عنہا فرماتی ہیں: سیدہ زینب رضی اللہ عنہا نے بآواز بلند پکار کر کہا: اے لوگو! میں نے ابوالعاص بن ربیع کو پناہ دے دی ہے، جب رسول اللہ صلی اللہ علیہ وسلم نماز سے فارغ ہوئے تو لوگوں کی جانب متوجہ ہو کر فرمایا: اے لوگو! جو آواز میں نے سنی ہے، کیا وہ آواز تم نے بھی سنی ہے؟لوگوں نے کہا: جی ہاں۔ آپ صلی اللہ علیہ وسلم نے فرمایا: اس ذات کی قسم جس کے قبضہ قدرت میں میری جان ہے جو آواز تم نے سنی اس کے سننے سے پہلے مجھے بھی اس بات کا پتا نہیں تھا، بیشک ایک ادنیٰ مسلمان بھی کسی کو پناہ دے سکتا ہے، پھر رسول اللہ صلی اللہ علیہ وسلم سیدہ زینب رضی اللہ عنہا کے پاس تشریف لائے، اور فرمایا: اے بیٹی! اس کا خیال رکھنا، لیکن اس کے ساتھ تنہا نہ ہونا کیونکہ تم اس پر حلال نہیں ہو۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5110]

ابن اسحاق کہتے ہیں: ام المومنین سیدہ عائشہ رضی اللہ عنہا فرماتی ہیں: جو لشکر ابوالعاص کا قافلہ لوٹ کر آیا تھا، اس کی جانب رسول اللہ صلی اللہ علیہ وسلم نے پیغام بھیجا ” یہ آدمی ہمارا ہے اور تم لوگوں نے اس کا مال چھینا ہے، اگر تم مہربانی کر کے اس کا مال اس کو لوٹا دو تو مجھے دلی خوشی ہو گی، اور اگر تمہیں اس بات سے انکار ہو تو بھی مجھے کوئی اعتراض نہیں ہے، کیونکہ یہ وہ مال غنیمت ہے جو اللہ تعالیٰ نے تمہیں عطا فرمایا ہے، اور تم لوگ ہی اس کے زیادہ حقدار ہو، صحابہ کرام رضی اللہ عنہم نے عرض کی: یا رسول اللہ صلی اللہ علیہ وسلم (ہماری کیا مجال ہے کہ آپ کا حکم ٹالیں) ہم اس کا مال اس کو لوٹا دیتے ہیں۔ چنانچہ انہوں نے ابوالعاص کا مال اس کو لوٹا دیا۔ حتی کہ کسی کے پاس اگر ان کی کوئی ایک رسی بھی تھی تو وہ بھی اس کو دے دی گئی، کسی کے پاس کوئی چھوٹا موٹا برتن یا پرانی کمان یا مشکیزہ تھا وہ بھی واپس کر دیا گیا، ایک آدمی ایک خوبصورت لونڈی لے کے آیا، اور واپس کر دی، الغرض ان کی پائی پائی واپس کر دی گئی۔ پھر وہ مکہ کی جانب روانہ ہو گئے، مکہ مکرمہ پہنچ کر قریش مکہ کا تمام مال ان کے مالکوں کو واپس کر دیا۔ پھر قریش سے کہا: اے گروہ قریش! تم میں کوئی آدمی ایسا تو نہیں بچا جس کو اس کا مال واپس نہ ملا ہو؟ قریش نے جواباً کہا: نہیں، اللہ تعالیٰ آپ کو جزائے خیر عطا فرمائے، ہم نے آپ کو امانتدار اور اچھا انسان پایا۔ اس کے بعد ابوالعاص نے کہا: تو میں گواہی دیتا ہوں کہ اللہ تعالیٰ کے سوا کوئی عبادت کے لائق نہیں ہے اور میں گواہی دیتا ہوں کہ بے شک محمد صلی اللہ علیہ وسلم اس کے بندے اور رسول ہیں۔ اور ابھی تک میں قبول اسلام سے صرف اس لئے رکا رہا کہ تم کہیں میرے بارے میں یہ بدگمانی نہ کرو کہ میں نے تمہارا مال ہتھیانے کے لئے اسلام قبول کیا ہے اب جبکہ میں نے وہ تمام مال تمہیں ادا کر دیا ہے اور میں تمہاری طرف سے فارغ ہوں تو میں نے اسلام قبول کر لیا، پھر وہ وہاں سے نکلے اور رسول اللہ صلی اللہ علیہ وسلم کی بارگاہ میں حاضر ہو گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5111]

ابن اسحاق کہتے ہیں: داود بن حصین نے عکرمہ کے حوالے سے ابن عباس رضی اللہ عنہما کا یہ بیان نقل کیا ہے: رسول اللہ صلی اللہ علیہ وسلم نے سات سال بعد سیدہ زینب رضی اللہ عنہا کو پہلے نکاح کی بنیاد پر ابوالعاص کے ساتھ رخصت فرما دیا، نیا کچھ نہیں کیا۔ ابوالعاص رضی اللہ عنہ اسلام قبول کرنے کے بعد دوبارہ مکہ میں آ گئے، انہوں نے نبی اکرم صلی اللہ علیہ وسلم کے ہمراہ کسی غزوہ میں شرکت نہیں کی۔ بعد میں وہ مدینہ منورہ میں آ گئے اور بارہویں سن ہجری میں ذی الحجہ میں سیدنا ابوبکر رضی اللہ عنہ کے دور خلافت میں فوت ہوئے۔ اور انہوں نے سیدنا زبیر بن عوام رضی اللہ عنہ کی طرف وصیت فرمائی تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5112]