ابن شہاب سے مروی ہے کہ سیدنا ضرار بن ازور اسدی رضی اللہ عنہ جنگِ اجنادین کے دن شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5114]

سیدنا ضرار بن ازور رضی اللہ عنہ سے روایت ہے کہ میں اپنے گھر والوں کی ایک دودھ دینے والی اونٹنی لے کر نبی کریم صلی اللہ علیہ وسلم کی خدمت میں حاضر ہوا، آپ صلی اللہ علیہ وسلم نے مجھ سے فرمایا: ”اس کا دودھ نکالو“، میں نے اسے پوری طرح نچوڑنا چاہا تو آپ صلی اللہ علیہ وسلم نے فرمایا: «لَا تُجْهِدْهَا، دَعْ دَاعِيَ اللَّبَنِ» ”اسے پوری طرح نہ نچوڑو، کچھ دودھ (تھنوں میں) باقی رہنے دو۔“
یہ حدیث صحیح الاسناد ہے، اور ہمیں سیدنا ضرار رضی اللہ عنہ کی رسول اللہ صلی اللہ علیہ وسلم سے اس کے علاوہ کوئی اور روایت معلوم نہیں۔ رہا ان کی فضیلت کا معاملہ، تو رسول اللہ صلی اللہ علیہ وسلم نے ان کے لیے اس وقت دعا فرمائی جب انہوں نے اپنا وہ قصیدہ سنایا تھا جس کا ذکر اگلی روایت میں ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5115]