سیدنا طلیب بن عمیر رضی اللہ عنہ سے روایت ہے کہ انہوں نے دارِ ارقم میں اسلام قبول کیا، پھر وہ اپنی والدہ اروی بنت عبدالمطلب (جو کہ نبی کریم صلی اللہ علیہ وسلم کی پھوپھی تھیں) کے پاس گئے اور کہا: میں نے محمد صلی اللہ علیہ وسلم کی پیروی اختیار کر لی ہے اور اللہ رب العالمین کے لیے اسلام لے آیا ہوں، ان کی والدہ نے کہا: بے شک تمہارے خالہ زاد (محمد صلی اللہ علیہ وسلم ) اس بات کے سب سے زیادہ حقدار ہیں کہ تم ان کی مدد کرو اور ان کا ساتھ دو، اللہ کی قسم! اگر ہم وہ کچھ کرنے کی طاقت رکھتے جو مرد رکھتے ہیں تو ہم بھی ان کی پیروی کرتے اور ان کا دفاع کرتے، طلیب کہتے ہیں کہ میں نے عرض کیا: اے میری ماں! آپ کو اسلام قبول کرنے اور ان کی پیروی کرنے سے کیا چیز روک رہی ہے؟! جبکہ آپ کے بھائی حمزہ رضی اللہ عنہ بھی اسلام لا چکے ہیں، انہوں نے کہا: میں دیکھتی ہوں کہ میری بہنیں کیا کرتی ہیں پھر میں بھی ان میں سے ایک بن جاؤں گی، طلیب نے کہا: میں آپ کو اللہ کا واسطہ دے کر کہتا ہوں کہ آپ ان کے پاس جائیں، انہیں سلام کریں، ان کی تصدیق کریں اور گواہی دیں کہ اللہ کے سوا کوئی معبود نہیں، اروی نے کہا: میں گواہی دیتی ہوں کہ اللہ کے سوا کوئی معبود نہیں اور میں گواہی دیتی ہوں کہ محمد اللہ کے رسول ہیں، چنانچہ اس کے بعد وہ اپنی زبان سے نبی کریم صلی اللہ علیہ وسلم کی تائید فرماتی تھیں اور اپنے بیٹے کو آپ صلی اللہ علیہ وسلم کی نصرت اور آپ کے احکامات کی بجا آوری پر ابھارتی رہتی تھیں۔
یہ حدیث امام بخاری کی شرط پر صحیح غریب ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5121]