ابوسلمہ بن عبدالرحمن فرماتے ہیں: سیدنا طلیب بن عمیر رضی اللہ عنہ دارارقم میں اسلام لائے تھے، پھر آپ وہاں سے نکلے اور اپنی والدہ محترمہ (اروی بنت عبدالمطلب) کے پاس آئے، اور کہنے لگے: میں نے محمد صلی اللہ علیہ وسلم کی پیروی اختیار کر لی ہے اور اللہ رب العالمین پر ایمان لے آیا ہوں، ان کی والدہ بولیں: تیری مدد اور تعاون کا زیادہ حقدار تیرے ماموں ہیں۔ خدا کی قسم! اگر ہم بھی اس بات پر قادر ہوتیں جس پر مرد حضرات قادر ہیں تو ہم بھی ان کی پیروی کرتیں، اور ان کی حمایت اور دفاع کرتیں، (اسلم بن طلیب) کہتے ہیں: میں نے کہا: امی جان! پھر آپ اسلام کیوں نہیں لے آتیں؟ اور حضور صلی اللہ علیہ وسلم کی اتباع کیوں نہیں کر لیتیں۔ آپ کے بھائی حمزہ بھی مسلمان ہو چکے ہیں، انہوں نے کہا: میں پہلے اپنی بہنوں کا رویہ دیکھ لوں پھر میں بھی ان میں شامل ہو جاؤں گی، میں نے کہا: میں اللہ کا واسطہ دے کر آپ سے کہتا ہوں کہ میں حضور صلی اللہ علیہ وسلم کی خدمت میں گیا تھا، آپ صلی اللہ علیہ وسلم کو سلام کیا، ان کی تصدیق کی اور اس بات کی گواہی دی ہے کہ اللہ تعالیٰ کے سوا کوئی عبادت کے لائق نہیں ہے (اور محمد صلی اللہ علیہ وسلم اللہ کے رسول ہیں) (میری والدہ) بولی: تو میں بھی گواہی دیتی ہوں کہ اللہ تعالیٰ کے سوا کوئی عبادت کے لائق نہیں ہے اور محمد صلی اللہ علیہ وسلم اللہ تعالیٰ کے رسول ہیں۔ پھر بعد میں وہ اپنی زبان کے ساتھ بھی حضور صلی اللہ علیہ وسلم کا دفاع کیا کرتی تھیں اور اپنے بیٹے کا بھی آپ صلی اللہ علیہ وسلم کی مدد اور تعمیل ارشاد ذہن بنایا کرتی تھی۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح غریب ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5121]