سیدنا عمرو بن سعید بن العاص بن امیہ بن عبد شمس بن عبد مناف رضی اللہ عنہ کا تذکرہ۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5122]

سیدنا عبداللہ بن عمرو بن سعید بن العاص رضی اللہ عنہ سے روایت ہے کہ جب خالد بن سعید رضی اللہ عنہ اسلام لائے اور ان کے والد ابواحیحہ نے ان کے ساتھ جو (سختی والا) سلوک کرنا تھا وہ کیا، مگر وہ اپنے دین سے نہ پھرے اور رسول اللہ صلی اللہ علیہ وسلم کے ساتھ وابستہ رہے، تو ان کے بھائی عمرو بن سعید بھی ان کے دین (اسلام) پر ثابت قدم رہے، جب عمرو اسلام لائے تو وہ اپنی زوجہ فاطمہ بنت صفوان بن امیہ کے ہمراہ سرزمینِ حبشہ میں اپنے بھائی خالد سے جا ملے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5123]

سیدہ ام خالد بنت خالد رضی اللہ عنہا بیان کرتی ہیں کہ میرے چچا عمرو بن سعید، میرے والد کے پہنچنے کے دو سال بعد ہمارے پاس حبشہ آئے اور وہیں مقیم رہے یہاں تک کہ رسول اللہ صلی اللہ علیہ وسلم کے صحابہ کے ساتھ کشتیوں میں سوار ہو کر روانہ ہوئے، یہ لوگ سن 7 ہجری میں خیبر کے موقع پر نبی کریم صلی اللہ علیہ وسلم کی خدمت میں پہنچے، چنانچہ عمرو نے نبی کریم صلی اللہ علیہ وسلم کے ہمراہ فتح مکہ، حنین، طائف اور تبوک میں شرکت کی، پھر جب لشکر شام کی طرف روانہ ہوئے تو وہ بھی ان کے ساتھ نکلے اور جمادی الاولیٰ سن 13 ہجری میں سیدنا ابوبکر صدیق رضی اللہ عنہ کے دورِ خلافت میں معرکہ اجنادین میں جامِ شہادت نوش کیا، اس دن لوگوں کے امیر عمرو بن العاص رضی اللہ عنہ تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5124]