سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”میں نے خواب میں دیکھا کہ گویا ابوجہل میرے پاس آیا اور اس نے میری بیعت کر لی ہے“، پھر جب خالد بن ولید رضی اللہ عنہ اسلام لائے تو رسول اللہ صلی اللہ علیہ وسلم سے عرض کیا گیا: اے اللہ کے رسول، اللہ نے آپ کے خواب کو سچ کر دکھایا، یہ (خواب) خالد کا اسلام لانا تھا، تو آپ صلی اللہ علیہ وسلم نے فرمایا: ”اس سے مراد کوئی اور (بھی) ہوگا“، یہاں تک کہ جب عکرمہ بن ابی جہل اسلام لائے تو وہ آپ کے خواب کی تصدیق ثابت ہوئی۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5137]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”میں نے ابوجہل کے لیے جنت میں کھجور کا ایک خوشہ دیکھا ہے“، پھر جب عکرمہ بن ابی جہل رضی اللہ عنہ اسلام لائے تو آپ صلی اللہ علیہ وسلم نے فرمایا: ”اے ام سلمہ! یہی وہ (خوشہ) ہے“، ام سلمہ رضی اللہ عنہا بیان کرتی ہیں کہ عکرمہ نے آپ صلی اللہ علیہ وسلم سے شکایت کی کہ جب وہ مدینہ سے گزرتے ہیں تو انہیں کہا جاتا ہے: ”یہ اللہ کے دشمن ابوجہل کا بیٹا ہے“، تو رسول اللہ صلی اللہ علیہ وسلم خطبہ دینے کے لیے کھڑے ہوئے اور فرمایا: ”لوگ معدنیات کی طرح ہیں، ان میں سے جو جاہلیت میں بہتر تھے وہی اسلام میں بھی بہتر ہیں بشرطیکہ وہ دین کی سمجھ حاصل کر لیں، کسی کافر کی وجہ سے کسی مسلمان کو تکلیف نہ پہنچاؤ۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5138]