ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم نے ارشاد فرمایا: میں نے خواب میں دیکھا ہے کہ ابوجہل میرے پاس آیا ہے اور آ کر میری بیعت کی ہے۔ پھر جب سیدنا خالد بن ولید رضی اللہ عنہ اسلام لائے تو کسی نے رسول اللہ صلی اللہ علیہ وسلم سے کہا: یا رسول اللہ صلی اللہ علیہ وسلم اللہ تعالیٰ نے آپ کے خواب کو سچ کر دیا ہے۔ وہ سیدنا خالد کا اسلام تھا۔ آپ علیہ السلام نے فرمایا: وہ کوئی اور شخص ہے۔ حتی کہ سیدنا عکرمہ بن ابوجہل ایمان لے آئے اور یہ حضور صلی اللہ علیہ وسلم کے خواب کی تصدیق تھی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5137]

ام المومنین سیدہ ام سلمہ رضی اللہ عنہا فرماتی ہیں کہ رسول اللہ صلی اللہ علیہ وسلم نے ارشاد فرمایا: میں نے ابوجہل کے لئے جنت میں انگوروں کا ایک خوشہ دیکھا ہے۔ جب سیدنا عکرمہ رضی اللہ عنہ مسلمان ہوئے تو نبی اکرم صلی اللہ علیہ وسلم نے فرمایا: اے ام سلمہ! یہ تھی وہ (جنتی خوشے کی حقیقت) ام سلمہ رضی اللہ عنہا فرماتی ہیں: رسول اللہ صلی اللہ علیہ وسلم نے فرمایا: ایک دفعہ عکرمہ نے مجھے شکایت کی کہ بعض لوگ ان کے بارے میں کہتے ہیں کہ یہ اللہ کے دشمن ابوجہل کا بیٹا ہے۔ تو رسول اللہ صلی اللہ علیہ وسلم نے فرمایا: بے شک لوگ کان کی مثل ہیں جو زمانہ جاہلیت میں باعزت تھا وہ اسلام لانے کے بعد بھی باعزت ہے جبکہ وہ دین کی سمجھ بوجھ رکھتے ہوں۔ تم مسلمان کو کسی کافر کی وجہ سے تکلیف مت دو۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5138]