ابن ابی ملیکہ سے روایت ہے کہ سیدنا عکرمہ بن ابی جہل رضی اللہ عنہ قرآن مجید کو (عقیدت سے) اپنے چہرے پر رکھتے اور روتے ہوئے کہتے تھے: ”میرے رب کا کلام، میرے رب کی کتاب۔“
ابوبکر صدیق رضی اللہ عنہ کے والد ابوقحافہ رضی اللہ عنہ کے مناقب کا ذکر: [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5139]

خلیفہ بن خیاط بیان کرتے ہیں کہ ابوقحافہ تیمی رضی اللہ عنہ کا نام عثمان بن عامر بن عمرو بن کعب بن سعد بن تیم بن مرہ تھا، انہوں نے فتح مکہ کے دن اسلام قبول کیا اور ہجرت کے چودہویں سال ماہِ محرم میں ستانوے سال کی عمر میں مکہ مکرمہ میں وفات پائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5140]

سیدنا انس رضی اللہ عنہ سے روایت ہے کہ فتح مکہ کے دن سیدنا ابوبکر صدیق رضی اللہ عنہ اپنے والد ابوقحافہ کو رسول اللہ صلی اللہ علیہ وسلم کی خدمت میں لائے، تو رسول اللہ صلی اللہ علیہ وسلم نے فرمایا: ”اگر تم ان بزرگ کو ان کے گھر میں ہی رہنے دیتے تو ہم خود ان کے پاس چلے جاتے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5141]

سیدنا ابوبکر صدیق رضی اللہ عنہ سے روایت ہے، انہوں نے کہا کہ میں ابوقحافہ کو لے کر رسول اللہ صلی اللہ علیہ وسلم کی خدمت میں حاضر ہوا، تو آپ صلی اللہ علیہ وسلم نے فرمایا: ”تم نے ان بزرگ کو وہیں کیوں نہ رہنے دیا کہ میں خود ان کے پاس آ جاتا؟“ میں نے عرض کیا: (اے اللہ کے رسول!) بلکہ وہ اس بات کے زیادہ حقدار ہیں کہ آپ کی خدمت میں حاضر ہوں، آپ صلی اللہ علیہ وسلم نے فرمایا: ”بے شک ہم ان کے بیٹے (ابوبکر) کے ہمارے اوپر احسانات کی وجہ سے ان کا لحاظ اور احترام کرتے ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5142]

امام زہری بیان کرتے ہیں کہ ابوقحافہ رضی اللہ عنہ کا نام عثمان بن عامر بن عمرو بن کعب بن سعد بن تیم بن مرہ بن کعب بن لوی بن غالب بن فہر تھا، وہ فتح مکہ کے دن اسلام لائے اور سن 14 ہجری کے ماہِ محرم میں وفات پائی، اس وقت ان کی عمر ستانوے برس تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5143]