یزید بن عمیر فرماتے ہیں: جب سیدنا معاذ بن جبل رضی اللہ عنہ کی وفات کا وقت قریب آیا تو لوگوں نے ان سے کہا: اے ابوعبدالرحمن! آپ ہمیں کوئی وصیت فرما دیں۔ انہوں نے کہا: مجھے بٹھاؤ، (جب وہ بیٹھ گئے تو کہنے لگے) علم اور ایمان اکٹھے رہتے ہیں جو ان دونوں کو ڈھونڈتا ہے یہ اس کو مل جاتے ہیں، یہ بات انہوں نے تین مرتبہ دہرائی۔ (پھر فرمایا) چار آدمیوں کے پاس علم ڈھونڈو۔ * سیدنا عویمر ابوالدرداء رضی اللہ عنہ کے پاس۔ * سیدنا سلمان فارسی رضی اللہ عنہ کے پاس۔ * سیدنا عبداللہ بن مسعود رضی اللہ عنہ کے پاس۔ * سیدنا عبداللہ بن سلام رضی اللہ عنہ کے پاس۔ (یہ پہلے یہودی تھے پھر مسلمان ہو گئے۔ میں نے رسول اللہ صلی اللہ علیہ وسلم کو ان کے بارے میں فرماتے سنا ہے ” یہ جنت میں جانے والے دس آدمیوں میں سے ایک ہیں۔) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5264]

سیدنا ابوعبیدہ اور سیدنا عبادہ بن صامت رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: معاذ بن جبل رضی اللہ عنہ انبیاء و مرسلین کے بعد تمام اولین و آخرین میں سب سے زیادہ علم والے ہیں۔ اور بے شک اللہ تعالیٰ ان پر فرشتوں کے سامنے فخر کا اظہار فرماتا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5265]