سیدنا معاذ بن جبل رضی اللہ عنہ سے روایت ہے کہ ان کے ایک بیٹے کا انتقال ہو گیا تو رسول اللہ صلی اللہ علیہ وسلم نے انہیں تعزیتی خط لکھا: ”بسم اللہ الرحمن الرحیم، محمد رسول اللہ کی طرف سے معاذ بن جبل کے نام، تم پر سلامتی ہو، میں تمہارے سامنے اس اللہ کی حمد بیان کرتا ہوں جس کے سوا کوئی معبود نہیں، اما بعد! اللہ تمہارے اجر کو عظیم کرے، تمہیں صبر کی توفیق دے اور ہمیں اور تمہیں شکر کی توفیق عطا فرمائے، بیشک ہماری جانیں، ہمارا مال اور ہمارے اہل و عیال اللہ عزوجل کے پاکیزہ عطیات اور اس کی عارضی طور پر سونپی گئی امانتیں ہیں، اللہ نے اس بیٹے کے ذریعے تمہیں خوشی و مسرت سے نوازا اور اب اسے بڑے اجر کے بدلے تم سے واپس لے لیا، اگر تم ثواب کی نیت رکھو تو اللہ کی طرف سے رحمت اور ہدایت تمہارے لیے ہے، پس صبر کرو، تمہاری جزع فزع تمہارے اجر کو ضائع نہ کر دے کہ تمہیں بعد میں پچھتانا پڑے، اور جان لو کہ رونا دھونا کسی چیز کو واپس نہیں لاتا اور نہ ہی غم کو دور کرتا ہے، اور جو فیصلہ نازل ہونا ہے وہ ہو کر رہتا ہے، والسلام۔“
یہ حدیث غریب حسن ہے لیکن مجاشع بن عمرو اس کتاب کی شرط پر نہیں ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5274]