موسیٰ بن علی بن رباح لخمی اپنے والد کا یہ بیان نقل کرتے ہیں کہ سیدنا عمر بن خطاب رضی اللہ عنہ نے لوگوں کو خطبہ دیا اور فرمایا: جو شخص قرآن کریم کے بارے میں کچھ پوچھنا چاہے، وہ سیدنا ابی بن کعب رضی اللہ عنہ کے پاس جائے اور جو حلال و حرام کے بارے میں پوچھنا چاہے، وہ سیدنا معاذ بن جبل رضی اللہ عنہ کے پاس جائے۔ اور جو مال کے بارے میں کچھ پوچھنا چاہے وہ میرے پاس آ جائے کیونکہ اللہ تعالیٰ نے مجھے خازن بنایا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5268]

سیدنا عبداللہ بن مسعود رضی اللہ عنہ فرماتے ہیں: سیدنا معاذ بن جبل رضی اللہ عنہ ” امۃ قانتاللہ حنیفا “ تھے۔ میں نے اپنے دل میں سوچا کہ ابوعبدالرحمن غلط کہہ رہے ہیں کیونکہ یہ بات تو اللہ تعالیٰ نے سیدنا ابراہیم علیہ السلام کے بارے میں کہی تھی جیسا کہ فرمایا: اِنَّ اِبْرَاھِیْمَ کَانَ اُمَّۃً قَانِتًا لِلّٰہِ انہوں نے کہا: تمہیں پتا ہے کہ اس آیت میں ” امۃ “ سے کیا مراد ہے؟ اور ” القانت “ سے کیا مراد ہے؟ میں نے کہا: اللہ بہتر جانتا ہے۔ انہوں نے کہا:” امۃ “ اس کو کہتے ہیں جو خیر کو جانتا ہو اور قانت اللہ اور اس کے رسول کی اتباع کرنے والے کو کہتے ہیں۔ اسی طرح سیدنا معاذ بن جبل رضی اللہ عنہ ” معلم الخیر “ بھی تھے اور اللہ اور اس کے رسول کے مطیع و فرمانبردار بھی تھے۔ ٭٭٭ شعبہ نے فراس سے انہوں نے شعبی سے، انہوں نے مسروق سے اور انہوں نے عبداللہ سے ایسے ہی روایت کیا ہے اور آخر سے اس کو مسند کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5269]

سیدنا عبداللہ رضی اللہ عنہ سے مروی ہے کہ سیدنا معاذ رضی اللہ عنہ ” امۃ قانتا “ تھے، قبیلہ اشجع سے تعلق رکھنے والے (فروہ بن نوفل نامی) ایک شخص نے ان سے کہا: وہ تو سیدنا ابراہیم علیہ السلام تھے۔ تو سیدنا عبداللہ رضی اللہ عنہ نے کہا: جس کو بھولنا تھا وہ بھول گیا ہم تو ان (سیدنا معاذ رضی اللہ عنہ) کو سیدنا ابراہیم علیہ السلام کے ساتھ تشبیہ دیا کرتے تھے۔ اور سیدنا عبداللہ رضی اللہ عنہ سے (قرآن کریم میں استعمال ہونے والے لفظ) ” امۃ “ کے بارے میں پوچھا گیا تو انہوں نے فرمایا: (امۃ کا مطلب ہے) خیر کی تعلیم دینے والے۔ اور قانت کا مطلب ہے اللہ اور اس کے رسول اللہ صلی اللہ علیہ وسلم کی اطاعت اور فرمانبرداری کرنے والے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5270]

سیدنا عبداللہ رضی اللہ عنہ فرماتے ہیں: جب رسول اللہ صلی اللہ علیہ وسلم کی وفات ہو گئی اور لوگوں نے سیدنا ابوبکر صدیق رضی اللہ عنہ کو خلیفہ تسلیم کر لیا اور رسول اللہ صلی اللہ علیہ وسلم سیدنا معاذ رضی اللہ عنہ کو یمن کی جانب بھیج چکے تھے۔ سیدنا ابوبکر رضی اللہ عنہ سیدنا عمر رضی اللہ عنہ کو حج کے ایام میں امیر مقرر فرمایا۔ یہ سیدنا معاذ رضی اللہ عنہ سے مکہ شریف میں ملے اس وقت ان کے ہمراہ کچھ غلام بھی تھے، انہوں نے پوچھا کہ کیا ہے؟ سیدنا معاذ رضی اللہ عنہ نے جواباً کہا: یہ غلام لوگوں نے مجھے تحائف کے طور پر دیئے ہیں اور یہ سیدنا ابوبکر رضی اللہ عنہ کے لئے ہیں۔ سیدنا عمر رضی اللہ عنہ نے کہا: میرا خیال ہے کہ تو ان سب کو لے کر سیدنا ابوبکر رضی اللہ عنہ کی خدمت میں حاضر ہو جا۔ چنانچہ اگلے دن دوبارہ ان کی ملاقات سیدنا عمر رضی اللہ عنہ سے ہو گئی، انہوں نے کہا: اے عمر بن خطاب رضی اللہ عنہ میں نے گزشتہ رات خواب میں دیکھا ہے گویا کہ میں آگ کی جانب جا رہا ہوں اور آپ مجھے میری کمر سے پکڑے ہوئے ہیں۔ اور میں صرف آپ کی فرمانبرداری کا ذہن رکھتا ہوں۔ چنانچہ وہ سیدنا ابوبکر رضی اللہ عنہ کی خدمت میں حاضر ہو گیا اور کہنے لگا: یہ اشیاء مجھے تحفہ میں ملی ہیں اور یہ آپ کیلئے ہیں۔ سیدنا ابوبکر رضی اللہ عنہ نے کہا: ہم نے تمہارے تحائف تمہارے سپرد کئے۔ سیدنا معاذ رضی اللہ عنہ نماز پڑھنے کے لئے نکل گئے، تو جب دیکھا کہ تمام لوگ ان کے پیچھے نماز پڑھ رہے ہیں سیدنا معاذ رضی اللہ عنہ نے پوچھا: تم لوگ کس کے لئے نماز پڑھ رہے ہو؟ انہوں نے کہا: اللہ تعالیٰ کے لیے۔ سیدنا معاذ رضی اللہ عنہ نے کہا: تو تم بھی اسی کے لیے ہو، (یہ کہہ کر) ان کو آزاد کر دیا۔ ٭٭ یہ حدیث شیخین کی شرط کے مطابق صحیح ہے لیکن ان دونوں حضرات نے اسے نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5271]

سیدنا عمر بن خطاب رضی اللہ عنہ نے خطبہ دیتے ہوئے ارشاد فرمایا: جو قرآن کریم کے بارے میں کچھ پوچھنا چاہے وہ سیدنا ابی بن کعب رضی اللہ عنہ کے پاس جائے، جو حلال و حرام کے بارے میں کچھ دریافت کرنا چاہے وہ سیدنا معاذ بن جبل رضی اللہ عنہ کے پاس جائے، جو وراثت کے بارے معلومات لینا چاہے وہ سیدنا زید بن ثابت رضی اللہ عنہ کے پاس جائے اور جو مال کے بارے میں پوچھنا چاہے وہ میرے پاس آ جائے کیونکہ میں مال کا خازن ہوں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5272]