خلیفہ بن خیاط سے روایت ہے کہ فضل بن عباس بن عبدالمطلب بن ہاشم کی کنیت ابو محمد تھی، انہوں نے رسول اللہ صلی اللہ علیہ وسلم کے ہمراہ مکہ اور حنین کے غزوات میں شرکت کی اور اس وقت ثابت قدم رہے جب لوگ پیٹھ پھیر کر بھاگ رہے تھے، وہ حجۃ الوداع میں بھی شریک تھے اور ان لوگوں میں شامل تھے جنہوں نے رسول اللہ صلی اللہ علیہ وسلم کو غسل دیا اور آپ صلی اللہ علیہ وسلم کی تدفین کے معاملے کو سنبھالا، پھر وہ جہاد کے لیے شام روانہ ہوئے اور سیدنا عمر بن خطاب رضی اللہ عنہ کے دورِ خلافت میں سنہ 18 ہجری میں طاعونِ عمواس کے دوران اردن کے علاقے میں وفات پائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5277]

یحییٰ بن معین کہتے ہیں کہ فضل بن عباس رضی اللہ عنہ سیدنا ابوبکر صدیق رضی اللہ عنہ کے عہدِ خلافت میں جنگِ یرموک کے دن شہید ہوئے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5278]

ابن اسحاق بیان کرتے ہیں کہ فضل بن عباس بن عبد المطلب کی کنیت ابو محمد تھی اور ان کی والدہ ام الفضل تھیں جن کا نام لبابہ بنت حارث تھا، وہ سیدنا ابوبکر صدیق رضی اللہ عنہ کی خلافت کے دوران سیدنا خالد بن ولید رضی اللہ عنہ کے لشکر کے ساتھ (جہاد کرتے ہوئے) شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5279]