سیدنا جابر بن عبداللہ رضی اللہ عنہما فرماتے ہیں: سیدنا معاذ بن جبل رضی اللہ عنہ سب سے زیادہ خوبصورت تھے اور سب سے زیادہ حسن اخلاق کے مالک تھے۔ اور اللہ کی راہ میں سب سے زیادہ خرچ کرنے والے تھے۔ بہت زیادہ قرضہ لیا ہوا تھا۔ قرض خواہ ان کے پیچھے پڑے رہتے تھے، حتی کہ ان سے بچنے کے لئے آپ کئی کئی دن اپنے گھر میں ہی چھپ کر بیٹھے رہتے۔ ان کے قرض خواہوں نے رسول اللہ صلی اللہ علیہ وسلم کی بارگاہ میں ان کی شکایت کر دی۔ رسول اللہ صلی اللہ علیہ وسلم نے سیدنا معاذ رضی اللہ عنہ کو بلا بھیجا، جب وہ حاضر بارگاہ رسالت ہوئے تو ان کے قرض خواہ بھی ان کے ہمراہ تھے۔ انہوں نے عرض کی: یا رسول اللہ صلی اللہ علیہ وسلم ہمیں اس سے ہمراہ حق دلوایئے۔ رسول اللہ صلی اللہ علیہ وسلم نے فرمایا: جو شخص اس کو معاف کر دے اللہ تعالیٰ اس پر رحم فرمائے گا۔ چنانچہ کچھ لوگوں نے ان کو قرضہ معاف کر دیا لیکن کچھ لوگوں نے ان کو معاف کرنے سے انکار کر دیا۔ اور اپنا حق وصول کرنے پر بضد رہے۔ رسول اللہ صلی اللہ علیہ وسلم نے سیدنا معاذ کو کہا: اے معاذ ان کے لئے صبر اختیار کر۔ تو رسول اللہ صلی اللہ علیہ وسلم نے ان کا مال بیچ کر قرض خواہوں کو دے دیا۔ قرض خواہوں نے جب وہ مال (اپنے اپنے حصص کے مطابق تقسیم کر لیا) تو ہر ایک کو سات میں سے پانچواں حصہ ملا۔ انہوں نے کہا: یا رسول اللہ صلی اللہ علیہ وسلم ہمارے حقوق کی ادائیگی کے لیے ان کو بیچ ڈالیں۔ تو رسول اللہ صلی اللہ علیہ وسلم نے فرمایا: اس کی جان اب چھوڑ دو، اب تمہیں اس پر کوئی زور نہیں ہے۔ تو سیدنا معاذ رضی اللہ عنہ بنی سلمہ کی جانب آئے تو ایک آدمی نے ان سے کہا: اے ابوعبدالرحمن اگر تم رسول اللہ صلی اللہ علیہ وسلم سے کچھ مانگ لیتے تو آج آپ امیر و کبیر ہوتے۔ انہوں نے کہا: میں نہیں مانگ سکتا تھا۔ راوی کہتے ہیں ابھی زیادہ دن نہیں گزرے تھے کہ رسول اللہ صلی اللہ علیہ وسلم نے ان کو بلایا اور یمن کا گونر بنا کر بھیج دیا اور فرمایا: ہو سکتا ہے کہ عنقریب اللہ تعالیٰ تیرے نقصان کی تلافی فرما دے اور تجھ سے تیرا دین پورا کروا دے۔ راوی کہتے ہیں: سیدنا معاذ رضی اللہ عنہ یمن کی جانب چلے گئے اور رسول اللہ صلی اللہ علیہ وسلم کی وفات تک وہیں رہے، اور جب سیدنا عمر رضی اللہ عنہ نے مکہ مکرمہ میں حج کیا تو ان سے ملاقات ہو گئی۔ اور سیدنا ابوبکر رضی اللہ عنہ نے ان کو حج کے امور کا نگران بنا دیا۔ یوم ترویہ کو ان کی ملاقات ہوئی، انہوں نے ایک دوسرے سے معانقہ کیا اور دونوں نے ایک دوسرے کو رسول اللہ صلی اللہ علیہ وسلم کی وفات کی تعزیت کی۔ پھر ایک جگہ پر کھڑے بہت دیر تک پرانی باتیں کرتے رہے۔ سیدنا عمر رضی اللہ عنہ نے سیدنا معاذ رضی اللہ عنہ کے پاس کچھ بچے دیکھے تو پوچھا یہ کیا ہے؟ پھر اس کے بعد وہ گفتگو فرمائی جس کا ابھی کچھ دیر پہلے ذکر گزرا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5276]

خلیفہ بن خیاط نے ان کا نسب یوں بیان کیا ہے ” فضل بن عباس بن عبدالمطلب بن ہاشم رضی اللہ عنہ “ ان کی کنیت ابومحمد ہے، رسول اللہ صلی اللہ علیہ وسلم کے ہمراہ فتح مکہ اور غزوہ حنین میں شرکت کی، اور جس وقت دوسرے لوگ پیٹھ پھیر کر بھاگ رہے تھے، یہ اس وقت بھی ثابت قدم رہے۔ حضور صلی اللہ علیہ وسلم کے ہمراہ حجۃ الوداع میں شریک ہوئے۔ رسول اللہ صلی اللہ علیہ وسلم کو غسل دینے اور آپ کی تکفین و تدفین کرنے والوں میں یہ بھی تھے۔ پھر آپ 18 ہجری میں عمواس کے طاعون کے زمانے میں ملک شام کی جانب اردن کے ایک نواحی علاقے میں جہاد کے لئے گئے۔ یہ واقعہ سیدنا عمر بن خطاب رضی اللہ عنہ کے دور خلافت کا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5277]

یحیی بن معین کہتے ہیں: سیدنا فضل بن عباس بن عبدالمطلب رضی اللہ عنہ، سیدنا ابوبکر رضی اللہ عنہ کے دور خلافت میں جنگ یرموک میں شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5278]