سیدنا عبداللہ بن مسعود رضی اللہ عنہ سے روایت ہے کہ سب سے پہلے جنہوں نے اپنے اسلام کا اظہار کیا وہ سات افراد تھے: رسول اللہ صلی اللہ علیہ وسلم ، ابوبکر، عمار، ان کی والدہ سمیہ، صہیب، مقداد اور بلال (رضی اللہ عنہم)۔ پس رسول اللہ صلی اللہ علیہ وسلم کی اللہ نے ان کے چچا ابوطالب کے ذریعے حفاظت فرمائی اور ابوبکر رضی اللہ عنہ کی ان کی قوم کے ذریعے حفاظت فرمائی، لیکن باقی لوگوں کو مشرکین نے پکڑ لیا، انہیں لوہے کی زرہیں پہنائیں اور تپتی دھوپ میں کھڑا کر دیا، ان میں سے ہر ایک نے (تکلیف کی شدت سے) ان کی مرضی کے مطابق بات کر دی سوائے بلال رضی اللہ عنہ کے، کیونکہ انہوں نے اللہ کی خاطر اپنی جان کی پرواہ نہ کی اور ان کی قوم کی نظر میں بھی ان کی کوئی حیثیت نہ تھی، چنانچہ انہوں نے بلال رضی اللہ عنہ کو بچوں کے حوالے کر دیا، وہ انہیں مکہ کی گھاٹیوں میں گھسیٹتے پھرتے اور بلال رضی اللہ عنہ (زبان سے) کہتے رہتے: «احد احد» (اللہ ایک ہے، اللہ ایک ہے)۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5321]

سیدنا جابر رضی اللہ عنہ سے روایت ہے کہ سیدنا عمر رضی اللہ عنہ نے فرمایا: ”ابوبکر رضی اللہ عنہ ہمارے سردار ہیں اور انہوں نے ہمارے سردار (بلال) کو آزاد کیا ہے۔“
یہ حدیث صحیح ہے لیکن شیخین نے اسے روایت نہیں کیا! [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5322]