سیدنا زید بن ارقم رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بلال کیا ہی خوب آدمی ہیں، وہ مؤذنوں کے سردار ہیں، ان کی پیروی صرف مؤذن ہی کریں گے، اور قیامت کے دن مؤذنوں کی گردنیں تمام لوگوں سے زیادہ لمبی (نمایاں) ہوں گی۔“ حسام اس حدیث کو روایت کرنے میں منفرد ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5327]

سیدنا بریدہ رضی اللہ عنہ سے روایت ہے کہ ایک دن صبح کے وقت رسول اللہ صلی اللہ علیہ وسلم نے بلال رضی اللہ عنہ کو بلایا اور فرمایا: ”اے بلال! تم جنت میں مجھ سے پہلے کس عمل کی وجہ سے پہنچے؟ میں کل رات جنت میں داخل ہوا تو میں نے اپنے سامنے تمہارے جوتوں کی آہٹ سنی، پھر میں سونے کے ایک چوکور اور بلند محل کے پاس آیا تو میں نے پوچھا: یہ محل کس کا ہے؟ انہوں نے کہا: امتِ محمد کے ایک شخص کا، میں نے کہا: میں محمد ہوں، یہ محل کس کا ہے؟ انہوں نے کہا: ایک عربی کا، میں نے کہا: میں عربی ہوں، یہ کس کا ہے؟ انہوں نے کہا: قریش کے ایک شخص کا، میں نے کہا: میں قریشی ہوں، یہ کس کا ہے؟ انہوں نے کہا: عمر بن خطاب کا“، اس پر بلال رضی اللہ عنہ نے عرض کیا: یا رسول اللہ! میں نے جب بھی اذان دی ہے تو اس کے بعد دو رکعت (نفل) ضرور پڑھے ہیں، اور مجھے جب بھی بے وضو ہونے کی نوبت آئی تو میں نے اسی وقت وضو کیا، رسول اللہ صلی اللہ علیہ وسلم نے فرمایا: ”اسی عمل کی وجہ سے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5328]

سیدنا عمرو بن عبسہ رضی اللہ عنہ بیان کرتے ہیں کہ میں نے نبی کریم صلی اللہ علیہ وسلم کو عکاظ میں قیام کے دوران دیکھا تو میں نے پوچھا: اس معاملے (دین) میں آپ کے ساتھ کون ہے؟ آپ صلی اللہ علیہ وسلم نے فرمایا: ”دو شخص: ابوبکر اور بلال“، چنانچہ میں اسلام لے آیا اور میں نے خود کو اسلام لانے والوں میں چوتھا شخص پایا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5329]