سیدنا انس بن مالک رضی اللہ عنہ سے روایت ہے کہ انہوں نے سیدنا حاطب بن ابی بلتعہ رضی اللہ عنہ کو یہ فرماتے ہوئے سنا کہ وہ غزوہ احد کے دن نبی کریم صلی اللہ علیہ وسلم کے پاس اس وقت پہنچے جب آپ صلی اللہ علیہ وسلم (زخموں کی وجہ سے) شدید تکلیف میں تھے، اس وقت سیدنا علی بن ابی طالب رضی اللہ عنہ کے ہاتھ میں ایک ڈھال تھی جس میں پانی تھا اور رسول اللہ صلی اللہ علیہ وسلم اس پانی سے اپنا چہرہ مبارک دھو رہے تھے، سیدنا حاطب رضی اللہ عنہ نے عرض کی: آپ کے ساتھ یہ (سلوک) کس نے کیا؟ آپ صلی اللہ علیہ وسلم نے فرمایا: ”عتبہ بن ابی وقاص نے، اس نے مجھ پر پتھر مارا جس سے میرا چہرہ زخمی ہو گیا اور میرا سامنے والا دانت ٹوٹ گیا۔“ حاطب کہتے ہیں کہ میں نے عرض کی: میں نے پہاڑ پر ایک پکارنے والے کو یہ پکارتے ہوئے سنا کہ محمد ( صلی اللہ علیہ وسلم ) شہید کر دیے گئے ہیں، تو میں (بے قراری میں) آپ کی طرف بھاگا اور (خوف کے مارے) ایسا محسوس ہو رہا تھا جیسے میری روح نکل گئی ہو، پھر میں نے پوچھا: عتبہ کس طرف گیا ہے؟ آپ صلی اللہ علیہ وسلم نے اس سمت اشارہ فرمایا جہاں وہ گیا تھا، چنانچہ میں اس کے پیچھے گیا یہاں تک کہ میں نے اسے پا لیا، پھر میں نے تلوار کے وار سے اس کا سر قلم کر دیا، پھر میں نیچے اترا اور اس کا سر، سامان اور گھوڑا لے کر نبی کریم صلی اللہ علیہ وسلم کی خدمت میں حاضر ہوا، آپ صلی اللہ علیہ وسلم نے وہ تمام سامان مجھے ہی عطا فرما دیا اور میرے لیے دعا کرتے ہوئے فرمایا: «رَضِيَ اللهُ عَنْكَ، رَضِيَ اللهُ عَنْكَ» ”اللہ تجھ سے راضی ہو، اللہ تجھ سے راضی ہو۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5391]