سیدنا انس بن مالک رضی اللہ عنہ فرماتے ہیں کہ سیدنا حاطب بن ابي بلتعہ رضی اللہ عنہ نے فرمایا: وہ جنگ احد میں رسول اللہ صلی اللہ علیہ وسلم کے سامنے آئے تو حضور صلی اللہ علیہ وسلم زخمی ہو چکے تھے، سیدنا علی بن ابی طالب رضی اللہ عنہ کے ہاتھ میں ایک ڈھال تھی جس میں پانی بھرا ہوا تھا، رسول الله صلی اللہ علیہ وسلم اس پانی کے ساتھ اپنا چہرہ مبارک دھو رہے تھے، سیدنا حاطب نے آپ صلی اللہ علیہ وسلم سے پوچھا: حضور صلی اللہ علیہ وسلم ! آپ کے ساتھ یہ سلوک کس نے کیا؟ آپ صلی اللہ علیہ وسلم نے فرمایا: عتبہ بن ابی وقاص نے میرے چہرے کو زخمی کر دیا ہے اور اس نے جو پتھر مارا ہے اس کی وجہ سے میرے دو دانت ٹوٹ گئے ہیں۔ میں نے کہا: میں نے ایک آدمی کی آواز سنی ہے وہ پہاڑ کی جانب سے چیخ چیخ کر کہہ رہا تھا کہ محمد صلی اللہ علیہ وسلم کو شہید کر دیا گیا ہے۔ میں تو آپ کی جانب چلا آیا ہوں، لیکن وہ اعلان سن کر ایک مرتبہ تو میری جان نکل گئی تھی۔ میں نے پوچھا کہ عتبہ کس سمت میں گیا ہے؟ آپ صلی اللہ علیہ وسلم نے اشارے سے مجھے بتا دیا۔ میں نے اس کا پیچھا کیا اور میں اپنے مقصد میں کامیاب ہو گیا، میں نے اس پر تلوار کا وار کیا اور اس کا سر تن سے جدا کر کے پھینک دیا پھر میں اس کے ہتھیار اور سر وغیرہ لے کر رسول اللہ صلی اللہ علیہ وسلم کے پاس آ گیا، رسول اللہ صلی اللہ علیہ وسلم نے اس کے ہتھیار وغیرہ مجھے ہی عطا فرما دیئے اور میرے لئے دو مرتبہ یہ دعا فرمائی ”رضی اللہ عنک“ الله تعالیٰ تجھ پر راضی ہو جائے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5391]