عتبہ اپنے والد کا یہ بیان نقل کرتے ہیں کہ جب سیدنا عبدالله بن مسعود رضی اللہ عنہ (رات کے وقت خوف خدا میں) روتے تھے تو صبح تک (ان کے رونے کی آواز ایسے آتی تھی جیسے) مکھی کی بھنبھنانے کی سی آواز آتی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5462]

سیدنا عبداللہ بن مرداس رضی اللہ عنہ فرماتے ہیں: سیدنا عبداللہ بن مسعود رضی اللہ عنہ ہر جمعرات کو کھڑے ہو کر درس دیا کرتے تھے۔ وہ بہت مختصر درس دیتے تھے حالانکہ ہماری خواہش ہوتی تھی کہ ابھی مزید درس دیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5463]

سیدنا حبہ عرنی کہتے ہیں۔ میں نے سیدنا عمر رضی اللہ عنہ کے یمن اور کوفہ کی جانب لکھے گئے مکتوب میں یہ لکھا دیکھا ہے ” امابعد! تم لوگ عرب کے لئے سر اور کھوپڑی کی حیثیت رکھتے ہو، تم میرے لئے ایک کمان کی حیثیت رکھتے ہو، اگر ادھر ادھر سے کوئی دشمن آئے تو میں اسی کمان کے ذریعے درست نشانہ لگا سکتا ہوں۔ میں نے تمہاری جانب عبدالله بن مسعود رضی اللہ عنہ کو عامل بنا کر بھیجا ہے، میں نے ہی ان کو تمہارے لئے چنا ہے اور ان کو اپنے اوپر ترجیح دی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5464]

سیدنا حبہ عرنی کہتے ہیں: کچھ لوگ سیدنا علی ابن ابی طالب رضی اللہ عنہ کے پاس آئے اور سیدنا عبداللہ بن مسعود رضی اللہ عنہ کی تعریف کرنے لگے۔ سیدنا علی رضی اللہ عنہ نے فرمایا ان کے بارے میں میرے نظریات بھی تمہاری طرح ہیں۔ وہ ان تمام لوگوں میں سب سے افضل ہیں جنہوں نے قرآن کریم پڑھا ہے۔ وہ اس کے حلال و حرام کو سب سے زیادہ بہتر سمجھنے والے ہیں۔ وہ فقیہ فی الدین اور عالم سنت تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5465]

سیدنا ابومسعود عقبہ بن عمرو فرماتے ہیں: ہم نے سیدنا عبداللہ بن مسعود رضی اللہ عنہ سے بڑھ کر ایسا کوئی شخص نہیں دیکھا جو رسول اللہ صلی اللہ علیہ وسلم پر نازل ہونے والے (قرآن کریم) کو ان سے زیادہ جانتا ہو۔ یہ بات سن کر سیدنا ابوموسیٰ نے فرمایا: تم یہ بات کر تو رہے ہو، اس کی وجہ یہ ہے کہ وہ اس وقت بھی قرآن سن رہے ہوتے تھے جب ہم نہیں سنتے تھے اور وہ اس وقت بھی رسول اللہ صلی اللہ علیہ وسلم کی بارگاہ میں حاضر رہتے تھے جب ہم حاضر نہیں ہوتے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5466]