علقمہ سے روایت ہے کہ میں شام آیا تو دو رکعت نماز ادا کی، پھر دعا کی: ”اے اللہ! میرے لیے کوئی نیک ہم نشین میسر فرما“، میری ملاقات کچھ لوگوں سے ہوئی تو میں ان کے پاس بیٹھ گیا، اچانک ایک صاحب آئے اور میرے پہلو میں بیٹھ گئے، میں نے پوچھا: یہ کون ہیں؟ لوگوں نے بتایا: یہ سیدنا ابو الدرداء رضی اللہ عنہ ہیں، میں نے ان سے کہا: میں نے اللہ سے دعا کی تھی کہ مجھے نیک ہم نشین عطا کرے تو اس نے آپ کو میسر فرما دیا، انہوں نے پوچھا: تمہارا تعلق کہاں سے ہے؟ میں نے کہا: اہل کوفہ سے، انہوں نے فرمایا: ”کیا تمہارے پاس ابنِ امِ عبد (سیدنا ابن مسعود) موجود نہیں جو رسول اللہ صلی اللہ علیہ وسلم کے جوتوں، تکیے اور وضو کے برتن کے نگران تھے؟ اور کیا تم میں وہ شخص (سیدنا عمار) موجود نہیں جسے اللہ نے اپنے نبی کی زبانِ مبارک کے ذریعے شیطان سے پناہ دی تھی؟ اور کیا تم میں رسول اللہ صلی اللہ علیہ وسلم کے وہ رازدار (سیدنا حذیفہ) نہیں جن کا راز ان کے سوا کوئی نہیں جانتا؟“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، اور اس سے پہلے والی تمام سندیں بھی صحیح ہیں لیکن شیخین نے انہیں روایت نہیں کیا، میں نے ان پر اس لیے تبصرہ نہیں کیا کیونکہ وہ مسند نہیں تھیں جبکہ یہ روایت مسند ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5468]