سیدنا خریم بن اوس بن حارثہ بن لام رضی اللہ عنہ سے روایت ہے، انہوں نے کہا: میں غزوہ تبوک سے رسول اللہ صلی اللہ علیہ وسلم کی واپسی پر ہجرت کر کے آپ کی خدمت میں حاضر ہوا اور اسلام قبول کر لیا، پھر میں نے سیدنا عباس بن عبدالمطلب رضی اللہ عنہ کو یہ کہتے ہوئے سنا: اے اللہ کے رسول! میں آپ کی مدح و ثنا بیان کرنا چاہتا ہوں۔ تو رسول اللہ صلی اللہ علیہ وسلم نے فرمایا: ”کہو، اللہ تمہارا منہ سلامت رکھے۔“ اس پر عباس رضی اللہ عنہ نے (اشعار میں) عرض کیا: ”آپ اس (دنیا میں آنے) سے پہلے سایوں میں اور اس جائے امان میں پاکیزہ رہے جب (جنت میں آدم و حوا پر) پتے جوڑے جا رہے تھے۔ پھر آپ زمین پر اترے، اس وقت آپ نہ بشر تھے، نہ گوشت کا لوتھڑا اور نہ جما ہوا خون۔ بلکہ آپ ایک نطفہ تھے جو کشتی میں سوار ہوا، جبکہ غرقابی نے نسر (بت) اور اس کے پجاریوں کو لگام ڈال دی تھی۔ آپ ایک پشت سے دوسرے رحم کی طرف منتقل ہوتے رہے، جب ایک عالم (نسل) گزر جاتا تو دوسرا طبقہ ظاہر ہوتا۔ یہاں تک کہ آپ کے باعظمت گھرانے نے خندف (قبیلے) کی اس بلندی کو پا لیا جس کے نیچے کئی طبقات تھے۔ اور جب آپ کی ولادت ہوئی تو زمین جگمگا اٹھی اور آپ کے نور سے افق روشن ہو گیا۔ پس ہم اسی روشنی، نور اور ہدایت کے راستوں پر گامزن ہیں۔“
اس حدیث کو ان اعرابی (دیہاتی) راویوں نے اپنے آباء سے روایت کرنے میں تفرد اختیار کیا ہے، اور اس طرح کے راویوں کو ضعیف قرار نہیں دیا جاتا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5504]