مجاہد سے روایت ہے، انہوں نے کہا: سیدنا ابوذر رضی اللہ عنہ نے اپنے پاس موجود چند لوگوں سے فرمایا: ”جیسا کہ تم دیکھ رہے ہو میری موت کا وقت قریب آ پہنچا ہے، اگر میرے پاس کوئی ایسا کپڑا ہوتا جو مجھے یا میری بیوی کو کفن کے لیے کافی ہوتا تو مجھے اسی میں کفن دیا جاتا۔ میں تمہیں قسم دیتا ہوں کہ تم میں سے کوئی ایسا شخص مجھے کفن نہ دے جو کسی قوم کا سردار، نقیب، امیر یا قاصد (سرکاری اہلکار) رہا ہو۔“ وہ سب لوگ معززین میں سے تھے، ان میں حجر مدری اور مالک اشتر بھی تھے، اور ان کے ہمراہ ایک انصاری شخص بھی تھا۔ انصاری کے علاوہ ان سب لوگوں نے ان عہدوں میں سے کوئی نہ کوئی عہدہ سنبھالا ہوا تھا۔ پس اس انصاری نے کہا: ”میں آپ کو اپنی اس چادر میں اور ان دو کپڑوں میں کفن دوں گا جو میرے تھیلے میں موجود ہیں، یہ میری والدہ کے کاتے ہوئے سوت سے بنے ہیں اور انہوں نے یہ میرے لیے بُنے تھے تاکہ میں ان میں احرام باندھ سکوں۔“ یہ سن کر سیدنا ابوذر رضی اللہ عنہ نے فرمایا: ”یہ میرے لیے کافی ہیں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5542]