ابو راشد حبرانی سے روایت ہے، انہوں نے کہا: میں نے رسول اللہ صلی اللہ علیہ وسلم کے پہرے دار سیدنا مقداد بن اسود رضی اللہ عنہ کو حمص میں صرافوں کے ایک صندوق پر بیٹھے دیکھا، وہ اپنی جسامت کی وجہ سے صندوق سے باہر نکل رہے تھے (یعنی ان کا جسم بھاری تھا)، اور ان کا ارادہ جہاد پر جانے کا تھا۔ میں نے ان سے کہا: ”(آپ کی عمر اور وزن کی وجہ سے) اللہ تعالیٰ نے آپ کو تو عذر دے رکھا ہے۔“ انہوں نے فرمایا: ”سورۃ البحوث (یعنی سورۃ التوبہ) نے ہم پر یہ عذر ماننے سے انکار کر دیا ہے، (جس میں اللہ کا فرمان ہے): ﴿انْفِرُوا خِفَافًا وَثِقَالًا﴾ ”تم نکلو، خواہ ہلکے ہو یا بوجھل۔“ [سورة التوبة: 41] راوی بقیہ کہتے ہیں کہ سورۃ البحوث سے مراد سورۃ التوبہ ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔
اور میں ابوبکر صدیق رضی اللہ عنہ کے مناقب کے شروع میں عبداللہ بن مسعود رضی اللہ عنہ کی یہ حدیث بیان کر چکا ہوں کہ: سب سے پہلے جن سات لوگوں نے اپنے اسلام کا اعلانیہ اظہار کیا، وہ رسول اللہ صلی اللہ علیہ وسلم ، ابوبکر، عمار، ان کی والدہ سمیہ، صہیب، بلال اور مقداد (رضی اللہ عنہم) تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5578]

عاصم، زر سے اور وہ سیدنا عبداللہ بن مسعود رضی اللہ عنہ سے سابقہ (ابتدا میں اسلام لانے والے سات افراد کی) حدیث کی طرح روایت کرتے ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5579]