سیدہ اسماء بنت ابی بکر رضی اللہ عنہا سے روایت ہے کہ سیدنا زبیر بن عوام رضی اللہ عنہ رسول اللہ صلی اللہ علیہ وسلم کے صحابہ کی ایک مجلس کے پاس سے گزرے جہاں سیدنا حسان بن ثابت رضی اللہ عنہ انہیں اپنا کلام سنا رہے تھے، لیکن وہ ان کے اشعار سننے میں کچھ زیادہ ذوق و شوق کا اظہار نہیں کر رہے تھے، چنانچہ سیدنا زبیر رضی اللہ عنہ ان کے ساتھ بیٹھ گئے اور فرمایا: ”کیا بات ہے کہ میں تمہیں ابن فریعہ (حسان) کے اشعار کی طرف متوجہ نہیں دیکھ رہا؟ حالانکہ وہ یہ اشعار رسول اللہ صلی اللہ علیہ وسلم کے سامنے پیش کیا کرتے تھے تو آپ صلی اللہ علیہ وسلم انہیں بہت توجہ سے سنتے، ان پر بھرپور جزا عطا فرماتے اور کوئی چیز آپ صلی اللہ علیہ وسلم کو ان کے کلام سے غافل نہیں کرتی تھی“۔ یہ سن کر سیدنا حسان رضی اللہ عنہ نے (سیدنا زبیر کی شان میں) یہ اشعار کہے: ”نبی کریم صلی اللہ علیہ وسلم کے حواری ان کے عہد اور ہدایت پر قائم رہے اور قول عمل کے مطابق ہی ہوتا ہے۔ وہ آپ صلی اللہ علیہ وسلم کے نقشِ قدم اور راستے پر ثابت قدم رہے، وہ حق کے مددگار ہیں اور حق ہی سب سے زیادہ عدل والا ہے۔ وہ مشہور شہسوار اور ایسے بہادر ہیں جو معرکہ کارزار میں دشمن پر جھپٹتے ہیں۔ جب جنگ اپنی پوری ہولناکی کے ساتھ برپا ہوتی ہے تو وہ اپنی چمکدار تلوار کے ساتھ موت کی طرف سبقت لے جاتے ہوئے اس کی آگ کو مزید بھڑکاتے ہیں۔ وہ شخص جس کی ماں صفیہ (رضی اللہ عنہا) ہوں اور اس کا گھرانہ قبیلہ اسد سے ہو، وہ یقیناً بلند مرتبہ و منزلت والا ہے۔ انہیں رسول اللہ صلی اللہ علیہ وسلم سے قریبی قرابت حاصل ہے اور اسلام کی نصرت کی وجہ سے انہیں قدیم و عظیم بزرگی ملی ہوئی ہے۔ کتنی ہی تکلیفوں کو زبیر نے اپنی تلوار کے ذریعے مصطفیٰ صلی اللہ علیہ وسلم سے دور کیا اور اللہ تعالی اس پر بہترین جزا عطا فرمانے والا ہے۔ ان (صحابہ) میں ان جیسا کوئی نہیں، نہ ان سے پہلے تھا اور نہ ہی رہتی دنیا تک کوئی ان کی مثل ہوگا جب تک یذبل کا پہاڑ قائم ہے۔ (اے زبیر!) آپ کی تعریف دوسرے لوگوں کے کاموں سے بہتر ہے، لیکن اے ہاشمیہ خاتون کے بیٹے! آپ کے کارنامے آپ کی تعریف سے بھی زیادہ افضل ہیں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5658]