مصعب بن عبداللہ زبیری سے روایت ہے کہ سیدنا خزیمہ بن ثابت رضی اللہ عنہ وہی ہیں جنہیں ”ذوالشہادتین“ کہا جاتا ہے، رسول اللہ صلی اللہ علیہ وسلم نے ان کی اکیلے کی گواہی کو دو آدمیوں کی گواہی کے برابر قرار دیا تھا، انہوں نے نبی کریم صلی اللہ علیہ وسلم کو خبر دی کہ انہوں نے خواب میں دیکھا ہے گویا وہ نبی کریم صلی اللہ علیہ وسلم کی پیشانی پر سجدہ کر رہے ہیں، تو نبی کریم صلی اللہ علیہ وسلم (ان کے خواب کی تعبیر کے لیے) لیٹ گئے یہاں تک کہ انہوں نے آپ صلی اللہ علیہ وسلم کی پیشانی پر سجدہ کر لیا، وہ جنگ صفین میں سیدنا عمار بن یاسر رضی اللہ عنہ کی شہادت کے بعد شہید ہوئے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5800]

محمد بن اسحاق سے روایت ہے کہ ذوالشہادتین سیدنا خزیمہ بن ثابت رضی اللہ عنہ سیدنا علی بن ابی طالب رضی اللہ عنہ کے ساتھ جنگ صفین میں شریک ہوئے اور اسی دن سن 37 ہجری میں شہید ہوئے، سیدنا خزیمہ رضی اللہ عنہ کے دو بھائی تھے جن میں سے ایک کا نام وحوح اور دوسرے کا عبداللہ تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5801]

محمد بن عمارہ بن خزیمہ بن ثابت اپنے دادا سے روایت کرتے ہیں کہ میرے دادا نے جنگ جمل اور جنگ صفین کے دن اپنا اسلحہ روک رکھا تھا یہاں تک کہ سیدنا عمار رضی اللہ عنہ شہید کر دیے گئے، پس جب عمار رضی اللہ عنہ شہید ہوئے تو انہوں نے کہا: میں نے رسول اللہ صلی اللہ علیہ وسلم کو فرماتے ہوئے سنا ہے: ”عمار کو ایک باغی گروہ قتل کرے گا“، راوی کہتے ہیں: تب انہوں نے اپنی تلوار سونتی اور قتال کیا یہاں تک کہ شہید ہو گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5802]