عروہ نے ان کا نسب یوں بیان کیا ہے ” خزیمہ بن ثابت بن فاکہہ بن ثعلبہ بن ساعدہ بن عامر بن غیان بن عامر بن خطمہ بن جشم “ آپ ذوشہادتین (اکیلے کی گواہی دو کے برابر) ہیں۔ ان کی کنیت ” ابوعمارہ “ ہے، فتح مکہ کے موقع پر خطمہ کا جھنڈا ان کے ہاتھ میں تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5799]

مصعب بن عبداللہ زبیری ان کا نسب بیان کرتے ہوئے فرماتے ہیں:” خزیمہ بن ثابت بن فاکہہ بن ثعلبہ بن ساعدہ بن عامر بن غیان بن عامر بن خطمہ “۔ آپ ذوشہادتین (دو کے برابر گواہی والے) ہیں رسول اللہ صلی اللہ علیہ وسلم نے ان کی اکیلے کی گواہی دو آدمیوں کے برابر قرار دی تھی۔ اور انہوں نے رسول اللہ صلی اللہ علیہ وسلم کو اپنا خواب سنایا تھا کہ میں نے نبی اکرم صلی اللہ علیہ وسلم کی پیشانی پر سجدہ کیا ہے، نبی اکرم صلی اللہ علیہ وسلم لیٹ گئے اور انہوں نے حضور صلی اللہ علیہ وسلم کی پیشانی پر سجدہ کیا۔ ٭٭ ابن اسحاق کہتے ہیں: سیدنا عمار بن یاسر رضی اللہ عنہ کی شہادت کے بعد جنگ صفین میں سیدنا علی رضی اللہ عنہ کی حمایت میں لڑتے ہوئے ان کی شہادت ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5800]

محمد بن اسحاق کہتے ہیں: سیدنا خزیمہ بن ثابت ذوشہادتین سیدنا علی رضی اللہ عنہ کی ہمراہی میں جنگ صفین میں شریک ہوئے اور اسی موقع پر 37 ہجری میں شہید ہو گئے۔ سیدنا خزیمہ کے دو بھائی تھے ان میں سے ایک کا نام ” دحرج “ تھا اور دوسرے کا ” عبداللہ “۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5801]