ابن جریج فرماتے ہیں: یہ آیت وَمِنَ النَّاسَ مَنْ یَّشْرِی نَفْسَہُ ابْتِغَآءَ مَرْضَاتِ اللہ درج ذیل آیت کے بارے میں فرماتے ہیں کہ یہ سیدنا صہیب بن سنان رضی اللہ عنہ اور سیدنا ابوذر رضی اللہ عنہ کے بارے میں نازل ہوئی۔ اور وہ شخص جو صہیب کو مدینہ کے راستے میں ملا وہ قنفذ بن عمرو جدعان تھا۔ ابن جریج کہتے ہیں: ابن عباس کے آزاد کردہ غلام عکرمہ کا خیال ہے کہ صہیب نے مکہ میں اپنے رشتہ داروں کو اپنا مال فدیہ کے طور پر دیا پھر وہاں سے ہجرت کر کے نکلے، ان لوگوں نے راستہ میں ان کو گھیر لیا تو جو مال باقی بچا وہ بھی نکال کر ان کے حوالے کر دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5812]

سیدنا صہیب بن سنان رضی اللہ عنہ فرماتے ہیں: رسول اللہ صلی اللہ علیہ وسلم عموماً یہ دعا مانگا کرتے تھے ” اے اللہ! تو وہ الٰہ نہیں ہے جو ہم نے خود بنایا ہے، اور نہ ہی تو وہ رب ہے جو ہم نے تازہ گھڑ لیا ہے، نہ تجھ سے پہلے ہمارا کوئی خدا جس کی ہم پناہ مانگتے ہوں، اور ہم تجھے چھوڑتے ہوں، اور نہ ہی ہم یہ سمجھتے ہیں کہ ہماری تخلیق پر کسی نے تیری مدد کی ہے کہ اس سے شرک ثابت ہوتا ہو، تو ہی برکت والا ہے اور بلند ہے۔ سیدنا کعب الاحبار فرماتے ہیں: نبی اکرم صلی اللہ علیہ وسلم یہ دعا مانگا کرتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5813]