یزید بن یزید بکری کہتے ہیں کہ سیدنا اویس رضی اللہ عنہ فرماتے ہیں: اللہ تعالیٰ کے معاملے میں ایسے ہو جاؤ، گویا کہ تو نے تمام لوگوں کا قتل کیا ہوا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5828]

ابوالاحوص کہتے ہیں: مجھے میرے ایک ساتھی نے یہ بات بتائی ہے کہ قبیلہ مراد سے ایک آدمی سیدنا اویس قرنی رضی اللہ عنہ کے پاس آیا، دعا سلام اور حال احوال دریافت کرنے کے بعد اس نے پوچھا: تمہارا زمانہ کیسا تھا؟ انہوں نے کہا: تم لوگوں کے بارے میں سوال مت کرو، انسان شام کرے تو صبح کی کوئی امید نہیں ہوتی اور صبح کرے تو شام کی کوئی امید نہیں، اے مراد کے رہنے والے! موت نے مومن کے لئے کوئی خوشی نہیں چھوڑی، اے مراد قبیلے کے رہنے والے! مومن جو حقوق اللہ کی پہچان رکھتا ہے اس کے لئے سونا اور چاندی کچھ نہیں ہے۔ اے مراد کے رہنے والے! مومن جو اللہ کے احکام کی پاسداری کرتا ہے اس کی نگاہ میں کسی دوست کی کوئی اہمیت نہیں ہے۔ خدا کی قسم! ہم بھلائی کا حکم دیتے ہیں۔ اور برائی سے منع کرتے ہیں۔ لیکن لوگ ہمیں اپنا دشمن سمجھتے ہیں۔ اور اس سلسلے میں فاسقوں کو اپنا ساتھی بنا لیتے ہیں۔ خدا کی قسم وہ ہم پر بڑے بڑے الزامات لگاتے ہیں لیکن بایں ہمہ میں کلمہ حق بلند کرنے سے باز نہیں آؤں گا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5829]