سیدنا سلمہ بن سلامہ بن وقش رضی اللہ عنہ سے روایت ہے، انہوں نے کہا: بنو عبد الاشہل میں ہمارا ایک یہودی پڑوسی تھا، وہ ایک دن اپنے گھر سے نکلا اور بنو عبد الاشہل کی مجلس کے پاس آ کر کھڑا ہوا، سلمہ کہتے ہیں کہ میں اس وقت نوجوان تھا اور ایک چادر اوڑھے اپنے گھر کے صحن میں لیٹا ہوا تھا، اس یہودی نے قیامت، دوبارہ جی اٹھنے، حساب کتاب، میزان، جنت اور دوزخ کا ذکر کیا، وہ یہ باتیں یثرب کے ان لوگوں کے سامنے کر رہا تھا جو بت پرست تھے اور موت کے بعد دوبارہ زندہ کیے جانے کے قائل نہ تھے، انہوں نے اس سے کہا: ”افسوس تم پر اے فلاں! کیا تمہارا یہ خیال ہے کہ ایسا واقعی ہونے والا ہے کہ لوگ مرنے کے بعد جنت اور دوزخ کی طرف اٹھائے جائیں گے اور انہیں وہاں ان کے اعمال کا بدلہ دیا جائے گا؟“ اس نے جواب دیا: ”ہاں، اس ذات کی قسم جس کی قسم کھائی جاتی ہے!“ انہوں نے پوچھا: ”اے فلاں! اس کی نشانی کیا ہے؟“ اس نے اپنے ہاتھ سے مکہ کی طرف اشارہ کرتے ہوئے کہا: ”ان علاقوں کی طرف سے ایک نبی مبعوث ہونے والا ہے“، انہوں نے پوچھا: ”تمہارے خیال میں وہ کب ظاہر ہوگا؟“ اس نے میری طرف دیکھا جبکہ میں ان سب میں عمر میں سب سے چھوٹا تھا، اور کہا: ”اگر اس لڑکے نے اپنی عمر پوری کی تو وہ اسے (اس نبی کے زمانے کو) پا لے گا۔“ سلمہ کہتے ہیں: اللہ کی قسم! ابھی زیادہ دن رات نہیں گزرے تھے کہ اللہ عزوجل نے رسول اللہ صلی اللہ علیہ وسلم کو مبعوث فرما دیا جبکہ وہ یہودی ابھی ہمارے درمیان زندہ موجود تھا، ہم تو آپ صلی اللہ علیہ وسلم پر ایمان لے آئے لیکن اس نے سرکشی اور حسد کی بنا پر کفر کیا، ہم نے اسے کہا: ”افسوس تم پر اے فلاں! کیا تم وہی نہیں ہو جس نے ہمیں آپ صلی اللہ علیہ وسلم کے بارے میں یہ سب کچھ بتایا تھا؟“ اس نے کہا: ”جی ہاں، لیکن یہ وہ (نبی) نہیں ہیں۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5873]