ابن اسحاق سے سیدنا سلمہ بن سلامہ بن وقش رضی اللہ عنہ کے نسب کے متعلق روایت ہے کہ وہ سلمہ بن سلامہ بن وقش بن زغبہ بن زعوراء بن عبد الاشہل بن جمح بن جشم بن حارث بن خزرج بن عمرو بن مالک بن اوس ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5869]

عروہ سے بیعتِ عقبہ میں شریک ہونے والے انصار، پھر قبیلہ اوس اور پھر بنو عبد الاشہل کے تذکرے میں روایت ہے کہ سیدنا سلمہ بن وقش رضی اللہ عنہ غزوہ بدر میں شریک ہوئے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5870]

محمد بن عمر سے روایت ہے کہ سیدنا سلمہ بن سلامہ بن وقش رضی اللہ عنہ کی کنیت ”ابو عوف“ تھی، تمام مؤرخین کے قول کے مطابق وہ بیعتِ عقبہ اولیٰ اور بیعتِ عقبہ ثانیہ میں ستر صحابہ کے ہمراہ شریک تھے، اور ان سب کا اس بات پر اتفاق ہے کہ سیدنا سلمہ رضی اللہ عنہ نے غزوہ بدر، احد، خندق اور رسول اللہ صلی اللہ علیہ وسلم کے ساتھ تمام غزوات میں شرکت کی، آپ کی وفات سن 45 ہجری میں ستر سال کی عمر میں ہوئی اور آپ مدینہ منورہ میں مدفون ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5871]

شباب بن خیاط سے روایت ہے کہ ابو عوف سیدنا سلمہ بن سلامہ بن وقش رضی اللہ عنہ کا انتقال سن 45 ہجری میں ہوا اور وہ مدینہ منورہ میں سپردِ خاک کیے گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5872]