سیدنا سعد رضی اللہ عنہ فرماتے ہیں: رسول اللہ صلی اللہ علیہ وسلم کی بارگاہ میں ایک پیالہ پیش کیا گیا، آپ صلی اللہ علیہ وسلم نے اس میں سے کچھ کھایا اور کچھ باقی چھوڑ دیا، پھر رسول اللہ صلی اللہ علیہ وسلم نے ارشاد فرمایا: اس راستے میں سے ایک جنتی آدمی آ کر اس کو کھائے گا، سیدنا سعد رضی اللہ عنہ فرماتے ہیں: میں اپنے بھائی عمیر کو وضو کرتے ہوئے چھوڑ کر آیا تھا، میرا خیال تھا کہ وہی آئیں گے، لیکن سیدنا عبداللہ بن سلام رضی اللہ عنہ تشریف لائے اور اس کو کھا لیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5868]

ابن اسحاق نے ان کا نسب یوں بیان کیا ہے ” سلمہ بن سلامہ بن وقش بن زغبہ بن زعوراء بن عبدالاشہل بن جمح بن جشم بن حارث بن خزرج بن عمرو بن مالک بن اوس “۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5869]

سیدنا عروہ فرماتے: انصار کے قبیلہ اوس کے بنی عبدالاشہل خاندان میں سے بیعت عقبہ میں شریک ہونے والوں میں ” سیدنا سلمہ بن وقش رضی اللہ عنہ “ ہیں، آپ جنگ بدر میں بھی شریک ہوئے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5870]

محمد بن عمر فرماتے ہیں: (ان کا نام) ” سلمہ بن سلامہ بن وقش “ ہے، ان کی کنیت ” ابوعوف “ ہے، تمام مؤرخین کا اس بات پر اتفاق ہے کہ آپ دونوں مرتبہ بیعت عقبہ میں ستر صحابہ کے ہمراہ شریک ہوئے۔ اور سب کا متفقہ قول ہے کہ آپ نے غزوہ بدر، احد، خندق اور تمام غزوات میں رسول اللہ صلی اللہ علیہ وسلم کے ہمراہ شرکت کی ہے، ستر برس کی عمر میں، آپ سن 45 ہجری میں فوت ہوئے، ان کو مدینہ شریف میں دفن کیا گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5871]