ابوسلمہ فرماتے ہیں: سیدنا عبداللہ بن عباس رضی اللہ عنہما نے سیدنا زید بن ثابت رضی اللہ عنہ کی رکاب تھامی، سیدنا زید بن ثابت نے کہا: اے رسول اللہ صلی اللہ علیہ وسلم کے چچا کے بیٹے آپ ہٹ جائیے۔ لیکن ابن عباس نے کہا: ہم اپنے بڑوں اور اپنے علماء کا ایسے ہی احترام کیا کرتے ہیں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے، لیکن شخین رحمۃ اللہ علیہما نے اس کو نقل نہیں کیا۔ نوٹ: سیدنا زید بن ثابت کے مناقب کا حق تو یہ تھا کہ ان کے مناقب کا آغاز قرآن جمع کرنے کے بارے میں احادیث سے کیا جائے، کیونکہ ان کے اس سلسلہ میں بہت سارے فضائل ہیں۔ لیکن کیونکہ امام بخاری رحمۃ اللہ علیہ اور امام مسلم رحمۃ اللہ علیہ نے وہ روایات نقل کر دی ہیں، اس لئے میں نے ان کو چھوڑ دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5895]