ابراہیم بن یحیی خارجہ بن زید اپنے والد کا یہ بیان نقل کرتی ہیں، سیدنا زید بن ثابت رضی اللہ عنہ کی وفات غروب آفتاب سے کچھ دیر پہلے ہوئی تھی اور میری یہ رائے تھی کہ ان کو صبح ہونے سے پہلے پہلے دفن کر دیا جائے۔ لیکن کچھ انصاری لوگ آ گئے اور کہنے لگے کہ ان کی تدفین دن کے وقت ہونی چاہیے تاکہ زیادہ سے زیادہ لوگ جنازہ میں شریک ہو سکیں۔ اس سلسلہ میں آوازیں بلند ہوئیں تو مروان نے ان آوازوں کو سن لیا اور وہ میرے پاس آ گیا اور کہنے لگا: میرا حکم ہے کہ صبح ہونے سے پہلے ان کی تدفین نہ کی جائے۔ جب صبح ہوئی تو ہم نے تین مرتبہ ان کو غسل دیا، ایک دفعہ پانی کے ساتھ، دوسری مرتبہ پانی اور بیری کے پتوں کے ساتھ اور تیسری مرتبہ کافور کے ساتھ۔ ہم نے ان کو تین کپڑوں میں کفن دیا، ان میں ایک کپڑا وہ بھی تھا جو سیدنا معاویہ نے ان کو دیا تھا۔ سورج طلوع ہونے کے بعد ان کی نماز جنازہ پڑھائی گئی اور مروان نے ان کی نماز جنازہ پڑھائی۔ مروان نے ان کے لئے کئی اونٹ بھیجے، وہ ذبح کر کے لوگوں کو کھلائے گئے، تین دن تک عورتیں ان پر روتی رہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5890]

سیدنا زید بن ثابت رضی اللہ عنہ فرماتے ہیں: رسول اللہ صلی اللہ علیہ وسلم نے مجھے فرمایا: کیا تم اچھے طریقے سے سریانی زبان جانتے ہو؟ میں نے کہا: نہیں۔ رسول اللہ صلی اللہ علیہ وسلم نے فرمایا: یہ زبان سیکھ لو، کیونکہ اس زبان میں ہمارے پاس خطوط آتے ہیں، (سیدنا زید) فرماتے ہیں: میں نے صرف 17 دن میں سریانی زبان سیکھ لی۔ ٭٭ اعمش کہتے ہیں: رسول اللہ صلی اللہ علیہ وسلم کے پاس عموماً خطوط آتے تھے اور آپ کی خواہش ہوتی کہ اس کی اطلاع قابل اعتماد لوگوں کے علاوہ کسی کو نہ ہو۔ ٭٭ اگر ثابت بن عبید کا سماع زید بن ثابت ہو جائے تو یہ حدیث صحیح ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5891]

عتبہ بن فاکہ فرماتے ہیں: میں نے سیدنا زید بن ثابت رضی اللہ عنہ کو ” ابوخارجہ “ کہہ کر پکارا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5892]

سیدنا سعید بن مسیب فرماتے ہیں: میں سیدنا زید بن ثابت رضی اللہ عنہ کے جنازے میں شریک ہوا تھا۔ جب ان کو ان کی قبر میں دفن کیا گیا۔ (اس کے بعد انہوں نے پوری حدیث بیان کی) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5893]

سیدنا انس بن مالک رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: میری امت میں، میری امت پر سب سے زیادہ رحم کرنے والے ” ابوبکر “ ہیں۔ اور اللہ تعالیٰ کے معاملہ میں سب سے زیادہ سخت گیر ” عمر “ ہے۔ اور سب سے زیادہ سچ بولنے والے اور سب سے زیادہ حیاء والے ” عثمان “۔ سب سے زیادہ قرآن کریم کی قراءتوں کو جاننے والے ” ابی بن کعب “ ہیں۔ وراثت کے بارے میں سب سے زیادہ علم رکھنے والے ” زید بن ثابت “ ہیں۔ اور سب سے زیادہ حلال و حرام کے بارے میں جاننے والے ” معاذ “ ہیں۔ خبردار! ہر امت کا ایک امین ہوتا ہے اور اس امت کا امین ” ابوعبیدہ بن جراح۔“ ٭٭ یہ اسناد امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے، لیکن شخین رحمۃ اللہ علیہما نے اس کو اس اسناد کے ہمراہ نقل نہیں کیا۔ اس اسناد کے ہمراہ شخین رحمۃ اللہ علیہما نے فقط ابوعبیدہ بن جراح کا ذکر کیا ہے۔ میں نے اس کی علت کتاب التلخیص میں ذکر کر دی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5894]