حماد بن زید نے بیان کیا کہ میں نے ایوب سے پوچھا: ”کیا آپ کو کسی کا علم ہے جو «أَمْرُكِ بِيَدِكِ» ”تیرا معاملہ تیرے ہاتھ میں ہے۔“ کی تفصیل میں حسن (بصری) کی طرح کہتا ہو؟“ (ان کا بیان اگلی روایت میں آ رہا ہے۔) ایوب نے کہا: ”نہیں، مگر وہی جو ہم کو قتادہ نے بہ سند کثیر مولیٰ ابن سمرہ سے، ابوسلمہ سے، انہوں نے سیدنا ابوہریرہ رضی اللہ عنہ سے، انہوں نے نبی کریم صلی اللہ علیہ وسلم سے اس کی مانند بیان کیا۔“ ایوب نے کہا: ”پھر کثیر مولیٰ ابن سمرہ ہمارے پاس آئے تو میں نے ان سے (اس روایت کے متعلق) پوچھا، تو انہوں نے کہا: ”میں نے یہ کبھی بیان نہیں کیا۔“ پھر میں نے ان کی یہ بات قتادہ سے کہی تو انہوں نے کہا کہ ”بیان تو کیا ہے مگر بھول گئے ہیں۔““ [سنن ابي داود/كتاب تفريع أبواب الطلاق /حدیث: 2204]

قتادہ، جناب حسن بصری رحمہ اللہ سے بیان کرتے ہیں کہ ” «أَمْرُكِ بِيَدِكِ» ”تیرا معاملہ تیرے ہاتھ میں ہے“ یہ تین طلاقیں ہوتی ہیں۔“ [سنن ابي داود/كتاب تفريع أبواب الطلاق /حدیث: 2205]