نافع بن عجیر بن عبد یزید بن رکانہ رحمہ اللہ سے مروی ہے کہ رکانہ بن عبد یزید رضی اللہ عنہ نے اپنی بیوی سہیمہ کو «الْبَتَّةَ» (بتہ) طلاق دے دی۔ پھر انہوں نے نبی کریم صلی اللہ علیہ وسلم کو اس کی خبر دی اور کہا: ”اللہ کی قسم! میں نے اس سے ایک ہی کا ارادہ کیا تھا۔“ تو رسول اللہ صلی اللہ علیہ وسلم نے فرمایا: ”اللہ کی قسم! کیا تو نے صرف ایک ہی کا ارادہ کیا تھا؟“ رکانہ رضی اللہ عنہ نے کہا: ”اللہ کی قسم! میں نے صرف ایک ہی کا ارادہ کیا تھا۔“ تو رسول اللہ صلی اللہ علیہ وسلم نے ان کی بیوی کو ان پر لوٹا دیا۔ چنانچہ انہوں نے اسے دوسری طلاق سیدنا عمر رضی اللہ عنہ کے دور میں اور تیسری طلاق سیدنا عثمان رضی اللہ عنہ کے دور میں دی۔ امام ابوداؤد رحمہ اللہ فرماتے ہیں کہ اس روایت کا ابتدائی حصہ ابراہیم بن خالد کلبی کے الفاظ ہیں اور آخری ابن السرح کے۔ [سنن ابي داود/كتاب تفريع أبواب الطلاق /حدیث: 2206]

محمد بن یونس نسائی اپنی سند سے نافع بن عجیر سے، وہ رکانہ بن عبد یزید رضی اللہ عنہ سے، وہ نبی کریم صلی اللہ علیہ وسلم سے یہی حدیث بیان کرتے ہیں۔ [سنن ابي داود/كتاب تفريع أبواب الطلاق /حدیث: 2207]

عبداللہ بن علی بن یزید بن رکانہ اپنے والد سے اور وہ اپنے دادا سے روایت کرتے ہیں کہ انہوں نے اپنی بیوی کو «أَلْبَتَّةَ» ”بتہ“ طلاق دے دی تھی، پھر وہ رسول اللہ صلی اللہ علیہ وسلم کے پاس آئے تو آپ صلی اللہ علیہ وسلم نے پوچھا: ”تم نے کیا ارادہ کیا تھا؟“ انہوں نے کہا: ”ایک کا۔“ آپ صلی اللہ علیہ وسلم نے پوچھا: ”اللہ کی قسم سے کہتے ہو؟“ انہوں نے کہا: ”اللہ کی قسم سے کہتا ہوں۔“ آپ صلی اللہ علیہ وسلم نے فرمایا: ”یہ وہی ہے جو تم نے ارادہ کیا۔“ امام ابوداؤد رحمہ اللہ کہتے ہیں: ”یہ روایت ابن جریج کی (گزشتہ) روایت (2196) سے صحیح تر ہے کہ رکانہ رضی اللہ عنہ نے اپنی بیوی کو تین طلاقیں دی تھیں کیونکہ یہ لوگ اس کے اپنے گھر والے ہیں، اور یہ اس کے متعلق بہتر جانتے ہیں، اور ابن جریج کی روایت ابورافع کے کسی بیٹے نے عکرمہ سے اور اس نے ابن عباس رضی اللہ عنہما سے روایت کی ہے۔“ [سنن ابي داود/كتاب تفريع أبواب الطلاق /حدیث: 2208]