سیدنا مغیرہ بن شعبہ رضی اللہ عنہ فرماتے ہیں کہ رسول اللہ صلی اللہ علیہ وسلم نے میری کنیت ” ابوعیسیٰ “ رکھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6001]

محمد بن عمر نے ان کا نسب یوں بیان کیا ہے ” مغیرہ بن شعبہ بن ابی عامر بن مسعود بن معتب بن مالک بن کعب بن عمرو بن سعد بن عوف بن ثقیف (ان کا نام قصی ہے) بن منبہ بن بکر بن ہوازن بن منصور بن عکرمہ بن خصفہ بن قیس بن غیلان بن مضر بن نزار “۔ ان کی کنیت ” ابوعبداللہ “ تھی۔ ان کو مغیرہ الرایٔ بھی کہا جاتا تھا۔ آپ بہت سمجھدار اور زیرک تھے۔ ان کو کبھی بھی دو امور میں سے ایک چننا پڑتا تو آپ بہت جلد کسی جانب نکلنے کا فیصلہ کر لیتے تھے۔ آپ رسول اللہ صلی اللہ علیہ وسلم کے پاس آئے اور حضور صلی اللہ علیہ وسلم کے ہاں قیام کیا اور 6 ہجری کو ذی القعدہ میں عمرہ حدیبیہ کیا۔ سیدنا مغیرہ فرماتے ہیں: رسول اللہ صلی اللہ علیہ وسلم کے ہمراہ میرا یہ پہلا سفر تھا، سیدنا ابوبکر صدیق رضی اللہ عنہ کے ہمراہ تھا، اور رسول اللہ صلی اللہ علیہ وسلم کے ساتھ مستقل رہنے والوں میں یہ بھی شامل تھے، عمرہ حدیبیہ کے بعد تمام غزوات میں رسول اللہ صلی اللہ علیہ وسلم کے ہمراہ شرکت کی، قبیلہ ثقیف کا ایک وفد رسول اللہ صلی اللہ علیہ وسلم کی بارگاہ میں آیا تو آپ صلی اللہ علیہ وسلم نے ان کا بہت اکرام فرمایا۔ رسول اللہ صلی اللہ علیہ وسلم نے ان کو اور اور سیدنا ابوسفیان بن حرب کو طائف کی جانب بھیجا تھا تو انہوں نے بہت سارے لشکروں کو شکست دی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6002]