ابووائل سے روایت ہے کہ میں معرکہ قادسیہ میں موجود تھا، سیدنا مغیرہ بن شعبہ رضی اللہ عنہ (رستم کی طرف) روانہ ہوئے، جب وہ رستم کے تخت کے قریب پہنچے تو جست لگا کر اس کے ساتھ تخت پر بیٹھ گئے، اس پر درباریوں نے حقارت سے غراہٹ کی آوازیں نکالیں، تو سیدنا مغیرہ بن شعبہ رضی اللہ عنہ نے ان سے فرمایا: ”تم اس بات سے کیوں گھبرا رہے ہو؟ میں ابھی اٹھ کر اپنی جگہ واپس چلا جاتا ہوں اور تمہارا یہ صاحب اپنی جگہ واپس آ جائے گا“، انہوں نے کہا: ہمیں بتاؤ کہ تم یہاں کیوں آئے ہو؟ سیدنا مغیرہ رضی اللہ عنہ نے فرمایا: ”ہم گمراہ تھے، پھر اللہ تعالیٰ نے ہم میں ایک نبی مبعوث فرمایا جس نے ہمیں اپنے دین کی طرف ہدایت دی اور ہمیں رزق عطا فرمایا، اس رزق میں ایک ایسا غلہ بھی شامل تھا جو تمہارے ان علاقوں میں پایا جاتا ہے، جب ہم نے اسے کھایا اور اپنے گھر والوں کو کھلایا تو انہوں نے کہا کہ ہمیں اس وقت تک چین نہیں آئے گا جب تک تم ہمیں ان علاقوں میں آباد نہیں کر دیتے“، انہوں نے کہا: تب تو ہم تمہیں قتل کر دیں گے، تو سیدنا مغیرہ رضی اللہ عنہ نے فرمایا: ”اگر تم نے ہمیں قتل کر دیا تو ہم جنت میں داخل ہو جائیں گے اور اگر ہم نے تمہیں قتل کر دیا تو تم آگ (جہنم) میں جاؤ گے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6013]