ابو اسماء رحبی بیان کرتے ہیں کہ رسول اللہ صلی اللہ علیہ وسلم کے مولیٰ سیدنا ثوبان رضی اللہ عنہ نے انہیں بتایا کہ میں رسول اللہ صلی اللہ علیہ وسلم کے پاس کھڑا تھا کہ یہودیوں کے علماء میں سے ایک عالم آیا اور اس نے کہا: اے محمد! آپ پر سلامتی ہو، میں نے اسے اتنی زور سے دھکا دیا کہ وہ گرنے کے قریب ہو گیا، اس نے پوچھا: تم نے مجھے دھکا کیوں دیا؟ میں نے کہا: تم نے ”یا رسول اللہ“ کیوں نہیں کہا؟ یہودی نے کہا: ہم تو انہیں اسی نام سے پکارتے ہیں جو ان کے گھر والوں نے رکھا ہے، تو رسول اللہ صلی اللہ علیہ وسلم نے فرمایا: ”یقیناً میرا وہ نام جو میرے گھر والوں نے رکھا محمد ( صلی اللہ علیہ وسلم ) ہی ہے۔“ یہودی نے کہا: میں آپ سے کچھ پوچھنے آیا ہوں، رسول اللہ صلی اللہ علیہ وسلم نے فرمایا: ”اگر میں تمہیں بتا دوں تو کیا وہ تمہیں نفع دے گا؟“ اس نے کہا: میں (جواب) اپنے کانوں سے سنوں گا، آپ صلی اللہ علیہ وسلم کے پاس ایک لکڑی تھی جس سے آپ صلی اللہ علیہ وسلم زمین کریدنے لگے اور فرمایا: ”پوچھو،“ یہودی نے کہا: جس دن ﴿يَوْمَ تُبَدَّلُ الْأَرْضُ غَيْرَ الْأَرْضِ وَالسَّمَاوَاتُ﴾ [سورة إبراهيم: 48] ”زمین دوسری زمین سے اور آسمان بدل دیے جائیں گے“ تو اس وقت لوگ کہاں ہوں گے؟ رسول اللہ صلی اللہ علیہ وسلم نے فرمایا: ”وہ پل (صراط) سے پہلے اندھیرے میں ہوں گے،“ اس نے پوچھا: سب سے پہلے اس سے کون گزرے گا؟ آپ صلی اللہ علیہ وسلم نے فرمایا: ”فقراء مہاجرین،“ اس نے پوچھا: جب وہ جنت میں داخل ہوں گے تو ان کی پہلی ضیافت کس چیز سے ہوگی؟ آپ صلی اللہ علیہ وسلم نے فرمایا: ”مچھلی کے جگر کے ٹکڑے سے،“ اس نے پوچھا: اس کے فوراً بعد ان کا کھانا کیا ہوگا؟ آپ صلی اللہ علیہ وسلم نے فرمایا: ”ان کے لیے جنت کا وہ بیل ذبح کیا جائے گا جو اس کے کناروں پر چرتا رہا ہے،“ اس نے پوچھا: اس پر ان کا پینا کیا ہوگا؟ آپ صلی اللہ علیہ وسلم نے فرمایا: ”جنت کی ایک نہر سے جس کا نام سلسبیل ہے،“ اس نے کہا: آپ نے سچ فرمایا، پھر اس نے کہا: میں آپ سے ایک ایسی بات پوچھنے آیا ہوں جسے روئے زمین پر کوئی نہیں جانتا سوائے کسی نبی کے یا ایک یا دو آدمیوں کے، آپ صلی اللہ علیہ وسلم نے فرمایا: ”اگر میں بتا دوں تو کیا تمہیں نفع ہوگا؟“ اس نے کہا: میں اسے غور سے سنوں گا، اس نے کہا: میں آپ سے بچے (کی تخلیق) کے بارے میں پوچھنے آیا ہوں، آپ صلی اللہ علیہ وسلم نے فرمایا: ”مرد کا پانی (مادہ منویہ) سفید ہوتا ہے اور عورت کا پانی زرد ہوتا ہے، پس جب یہ دونوں جمع ہوتے ہیں اور مرد کا مادہ عورت کے مادے پر غالب آ جائے تو اللہ کے حکم سے لڑکا پیدا ہوتا ہے، اور جب عورت کا مادہ مرد کے مادے پر غالب آ جائے تو اللہ کے حکم سے لڑکی پیدا ہوتی ہے،“ یہودی نے کہا: آپ نے سچ فرمایا اور آپ بلاشبہ اللہ کے نبی ہیں، پھر وہ پیٹھ پھیر کر چلا گیا، تو رسول اللہ صلی اللہ علیہ وسلم نے فرمایا: ”اس شخص نے مجھ سے جن باتوں کے بارے میں سوال کیا، مجھے ان کا کچھ علم نہیں تھا یہاں تک کہ اللہ تعالیٰ نے وہ علم مجھے عطا فرما دیا۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6153]