رسول اللہ صلی اللہ علیہ وسلم کے آزاد کردہ غلام سیدنا ثوبان رضی اللہ عنہ بیان کرتے ہیں کہ میں رسول اللہ صلی اللہ علیہ وسلم کے سامنے کھڑا ہوا تھا ایک یہودی عالم حضور صلی اللہ علیہ وسلم کے پاس آیا اور کہا ” السلام علیک یا محمد “۔ میں نے اس کو اچانک زور دار دھکا دیا، اس نے پوچھا: تم نے مجھے دھکا کیوں دیا؟ میں نے کہا: تم ” یا رسول اللہ صلی اللہ علیہ وسلم نہیں کہہ سکتے؟ یہودی نے کہا: ہم تو ان کو اسی نام سے پکاریں گے جو نام ان کے گھر والوں نے رکھا ہے۔ رسول اللہ صلی اللہ علیہ وسلم نے فرمایا: میرے گھر والوں نے میرا نام ” محمد “ رکھا ہے۔ یہودی نے کہا: میں آپ سے کچھ پوچھنے کے لئے آیا ہوں۔ رسول اللہ صلی اللہ علیہ وسلم نے پوچھا: اگر میں تمہیں کچھ بتاؤں تو تمہیں اس کا کوئی فائدہ ہو گا؟ اس نے کہا: میں اپنے کانوں سے آپ کی بات سنوں گا۔ رسول اللہ صلی اللہ علیہ وسلم نے ایک لکڑی کے ساتھ اس کو چوبھ ماری اور فرمایا: پوچھو! یہودی نے کہا: جس دن زمین آسمان ریزہ ریزہ ہو جائیں گے تو اس دن لوگ کہاں ہوں گے؟ حضور صلی اللہ علیہ وسلم نے فرمایا: اندھیرے میں ہوں گے لیکن ابھی حشر قائم نہیں ہوا ہو گا۔ اس نے پوچھا: سب سے پہلے کس کو اجازت ملے گی؟ حضور صلی اللہ علیہ وسلم نے فرمایا: فقراء مہاجرین کو۔ اس نے پوچھا: جس دن وہ جنت میں داخل ہوں گے تو ان کو سب سے پہلے کیا تحفہ دیا جائے گا؟ آپ نے فرمایا: مچھلی۔ اس نے کہا: اس کے بعد ان کو کھانے کو کیا دیا جائے گا؟ رسول اللہ صلی اللہ علیہ وسلم نے فرمایا: ان کے لئے جنتی بیل ذبح کیا جائے گا جس کے سری پائے وغیرہ دنیا میں کھایا کرتا تھا۔ اس نے پوچھا: ان کو پینے کیلئے کیا دیا جائے گا؟ رسول اللہ صلی اللہ علیہ وسلم نے ارشاد فرمایا: ایک نہر ہے جس کا نام ” سلسبیل “ ہے۔ اس یہودی نے کہا: آپ نے سچ فرمایا: اور میں آپ سے ایک ایسی بات پوچھنے کے لئے آیا ہوں جو نبی کے علاوہ صرف ایک دو آدمی ہی جانتے ہیں۔ آپ صلی اللہ علیہ وسلم نے فرمایا: اگر میں تمہیں اس کا جواب دے دوں تو کیا تمہیں اس کا کوئی فائدہ ہو گا؟ اس نے کہا: میں اپنے کانوں سے اس کو سنوں گا۔ اس نے کہا: میں بیٹے کے بارے میں پوچھنا چاہتا ہوں (کہ ایک ہی میاں بیوی سے کبھی بیٹا پیدا ہوتا ہے اور کبھی بیٹی، اس کی وجہ کیا ہے؟) آپ صلی اللہ علیہ وسلم نے فرمایا: مرد کا مادہ سفید رنگ کا ہوتا ہے اور عورت کا مادہ زرد رنگ کا ہوتا ہے تو جب یہ دونوں مادے جمع ہوتے ہیں تو اگر مرد کی منی عورت کی منی پر غالب آ جائے تو اللہ کے حکم سے لڑکا پیدا ہوتا ہے اور اگر عورت کی منی مرد کی منی پر غالب آ جائے تو اللہ کے حکم سے لڑکی پیدا ہوتی ہے۔ یہودی نے کہا: آپ نے بالکل سچ فرمایا: بے شک آپ واقعی نبی ہیں، پھر وہ شخص چلا گیا۔ رسول اللہ صلی اللہ علیہ وسلم نے فرمایا: اس شخص نے جتنی بھی باتیں پوچھی ہیں، ان سب کے جواب مجھے اللہ تعالیٰ کی طرف سے بتائے جاتے ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6153]