محمد بن عمر فرماتے ہیں: صفوان بن معطل کی کنیت ” ابوعمرو “ تھی۔ آپ غزوہ مریسیع سے پہلے اسلام لائے اور رسول اللہ صلی اللہ علیہ وسلم کے ہمراہ اس غزوہ میں شریک ہوئے، آپ جابر فہری کے ہمراہ ان عرنیوں کو پکڑنے کے لئے گئے تھے جنہوں نے ذی الجدر میں رسول اللہ صلی اللہ علیہ وسلم کے صدقے کے اونٹ اغوا کر لئے تھے۔ صفوان بن معطل شمشاط میں 60 ہجری کو فوت ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6329]

سیدنا صفوان بن معطل سلمی کے بارے میں مروی ہے کہ انہوں نے رسول اللہ صلی اللہ علیہ وسلم سے کوئی مسئلہ پوچھا اور کہا: اے اللہ کے نبی صلی اللہ علیہ وسلم میں آپ سے ایسی بات پوچھ رہا ہوں جس کے بارے میں آپ جانتے ہیں اور میں اس سے جاہل ہوں۔ نبی اکرم صلی اللہ علیہ وسلم نے پوچھا: وہ کیا ہے؟ اس نے کہا: یا رسول اللہ صلی اللہ علیہ وسلم کیا دن اور رات میں کوئی ساعت ایسی ہے جس میں نماز مکروہ ہے؟ آپ صلی اللہ علیہ وسلم نے فرمایا: جب تم فجر کی نماز پڑھ لو تو سورج طلوع ہونے تک (نفلی) نماز چھوڑ دو، کیونکہ سورج شیطان کے سینگوں کے درمیان طلوع ہوتا ہے، (جب سورج خوب بلند ہو جائے تو) پھر نماز پڑھ سکتے ہو، یہاں تک کہ سورج سر پر نیزے کی طرح برابر ہو جائے، جب سورج نیزے کی طرح سر پر آ جائے تب نماز نہ پڑھو کیونکہ اس وقت دوزخ کو بھڑکایا جاتا ہے، اور اسی وقت جہنم کے دروازے کھولے جاتے ہیں، سورج ڈھلنے تک نماز سے رکے رہو، پھر جب سورج ڈھل جائے تو نماز عصر پڑھنے تک نماز پڑھ سکتے ہو، (پھر جب عصر پڑھ لو تو) غروب آفتاب تک (نفلی) نماز سے رکے رہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6330]

سیدنا صفوان بن معطل فرماتے ہیں: رسول اللہ صلی اللہ علیہ وسلم نے مجھے یہ اعلان کرنے کے لئے بھیجا کہ مٹی کے گھڑے میں نبیذ نہ بنائیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6331]