ام بکر بنت مسور بن مخرمہ اپنے والد کا یہ بیان نقل کرتی ہیں: رسول اللہ صلی اللہ علیہ وسلم نے مجھے ایک تھال میں کھجوریں عطا فرمائیں۔ میرے پاس تمہارے اس مٹی کے برتن جیسا بھی کوئی برتن نہ تھا۔ رسول اللہ صلی اللہ علیہ وسلم کا جب انتقال ہوا، اس وقت میری عمر 11 سال تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6356]

سیدنا مسور بن مخرمہ رضی اللہ عنہ فرماتے ہیں: رسول اللہ صلی اللہ علیہ وسلم کے پاس کچھ قبائیں آئیں، آپ صلی اللہ علیہ وسلم نے وہ چادریں اپنے صحابہ کرام رضی اللہ عنہم میں تقسیم فرما دیں۔ میرے والد نے مجھے کہا: تو ہمارے ساتھ چل، رسول اللہ صلی اللہ علیہ وسلم کے پاس چادریں آئی ہیں، حضور صلی اللہ علیہ وسلم کے دوازے پر پہنچ کر میرے والد صاحب میرے ساتھ گفتگو کر رہے تھے، رسول اللہ صلی اللہ علیہ وسلم نے ان کی آواز پہچان لی، آپ صلی اللہ علیہ وسلم چادر لے کر باہر تشریف لائے اور فرمایا: میں نے یہ چادر آپ کے لئے بچا کر رکھی ہوئی تھی، آپ کے لئے بچا کر رکھی تھی۔ ٭٭ یہ حدیث مسلم شریف میں درج ہے۔ میں نے یہ حدیث دوبارہ اس لئے لکھی ہے تاکہ پڑھنے والے کو معلوم ہو جائے کہ سیدنا مسور بن مخرمہ رضی اللہ عنہ اپنے والد کے ہمراہ نبی اکرم صلی اللہ علیہ وسلم کی خدمت میں حاضر ہوئے تھے۔ سیدنا مسور رضی اللہ عنہ کو رسول اللہ صلی اللہ علیہ وسلم کے خطبے یاد تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6357]