سیدنا مسور بن مخرمہ رضی اللہ عنہ فرماتے ہیں کہ رسول اللہ نے ہمیں عرفات میں خطبہ دیا، اللہ تعالیٰ کی حمد و ثناء کے بعد فرمایا: امابعد، بے شک مشرکین اور بتوں کے پجاری لوگ یہاں سے اس وقت روانہ ہو جاتے تھے جب کہ سورج پہاڑوں کے اوپر ایسے ہوتا تھا جیسے آدمی کے سر پر عمامہ ہو۔ جبکہ ہم سورج غروب ہونے کے بعد یہاں سے نکلیں گے۔ اور وہ لوگ مشعر الحرام سے (یعنی مزدلفہ سے) اس وقت روانہ ہوتے تھے جبکہ سورج طلوع ہو چکا ہوتا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ اور میرے بیان سے یہ بات واضح ہو گئی ہے کہ سیدنا مسور بن مخرمہ رضی اللہ عنہ کا رسول اللہ صلی اللہ علیہ وسلم سے سماع ثابت ہے۔ اور حقیقت حال ویسی نہیں ہے جو ہمارے ساتھیوں نے سمجھ رکھی ہے کہ مسور بن مخرمہ ان لوگوں میں شامل ہیں جو بغیر سماع کے روایت کرتے ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6358]