خلیفہ بن خیاط فرماتے ہیں: ابومحمد عبداللہ بن عمرو بن عاص رضی اللہ عنہ اور ان کی والدہ ” ریطہ بنت منبہ بن حجاج بن عمر بن حذیفہ بن سعد بن سہم “ کا انتقال 65 ہجری کو ہوا۔ آپ کالے رنگ کا خضاب لگاتے تھے۔ سیدنا عمرو بن عاص رضی اللہ عنہ اپنے بیٹے سے صرف 12 برس بڑے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6368]

ابوعبداللہ قرشی فرماتے ہیں: سیدنا عبداللہ بن عمر، عبداللہ بن عمرو کے پاس گئے، عبداللہ بن عمرو نے اپنی داڑھی شریف کو سیاہ خضاب لگا رکھا تھا، سیدنا عبداللہ بن عمر رضی اللہ عنہما نے ان کو یوں سلام کیا: السلام علیک ایھا الشویب۔ اے پیارے بوڑھے، تم پر سلامتی ہو۔ سیدنا عبداللہ بن عمرو نے کہا: اے ابوعبدالرحمن! کیا تم نے مجھے پہچانا نہیں ہے؟ انہوں نے کہا: کیوں نہیں۔ میں آپ کو بوڑھے کو پہچانتا ہوں لیکن آج تو آپ جوان ہیں۔ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ زردی مومن کا خضاب ہے اور سرخی مسلمان کا خضاب ہے اور سیاہی کافر کا خضاب ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6369]

ابوعبدالرحمن حبلی فرماتے ہیں: سیدنا عبداللہ بن عمرو رضی اللہ عنہ کے پاس تین آدمی آئے اور انہوں نے آپ کو ” ابومحمد “ کہہ کر پکارا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6370]

مصعب بن عبداللہ زبیری فرماتے ہیں: عبداللہ بن عمرو بن عاص رضی اللہ عنہ، آپ کی والدہ کا نام ” ریطہ بنت منبہ بن حجاج بن عامر بن حذیفہ بن سعد بن سہم بن عمرو بن ہصیص بن کعب بن لویٔ “ ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6371]