سیدنا واثلہ بن اسقع رضی اللہ عنہ فرماتے ہیں: جب میں اسلام لایا تو نبی اکرم صلی اللہ علیہ وسلم کی خدمت میں حاضر ہوا، حضور صلی اللہ علیہ وسلم نے مجھے فرمایا: جاؤ، پانی اور بیری کے ساتھ غسل کرو اور اپنے جسم سے کفر کے بالوں کو دور کر دو، اس وقت رسول اللہ صلی اللہ علیہ وسلم نے میرے سر پر ہاتھ پھیرا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6570]

عباس بن محمد دوری فرماتے ہیں: عبداللہ ابن ابی اوفیٰ رضی اللہ عنہ (کی کنیت) ابومعاویہ ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6571]

محمد بن عمر نے آپ کا نسب یوں بیان کیا ہے ” عبداللہ ابن ابی اوفیٰ رضی اللہ عنہ کے والد ” ابواوفیٰ “ کا نام ” علقمہ بن خالد بن حارث بن ابی اسید بن رفاعہ بن ثعلبہ بن ہوازن بن اسلم بن افصٰی “ ہے۔ ان کی کنیت ” ابومعاویہ “ ہے۔ سیدنا عبداللہ ابن ابی اوفیٰ رضی اللہ عنہ نے رسول اللہ صلی اللہ علیہ وسلم کے ہمراہ سب سے پہلے غزوہ خیبر میں شرکت کی اور اس کے بعد کے تمام غزوات میں برابر شریک رہے۔ رسول اللہ صلی اللہ علیہ وسلم کے انتقال تک آپ مدینہ منورہ میں رہے، اس کے بعد آپ کوفہ میں شفٹ ہو گئے۔ جب مسلمانوں نے وہاں اقامت اختیار کی تو آپ بھی وہاں قیام پذیر ہو گئے، قبیلہ اسلم میں انہوں نے ایک مکان بھی بنایا تھا، آخری عمر میں ان کی بینائی زائل ہو گئی تھی۔ سن 86 ہجری میں کوفہ میں آپ کا انتقال ہوا۔ اسماعیل بن ابی خالد بیان کرتے ہیں: میں نے سیدنا عبداللہ ابن ابی اوفیٰ رضی اللہ عنہ کے ہاتھ پر ایک زخم دیکھا تو میں نے پوچھا کہ آپ کو یہ زخم کب لگا؟ انہوں نے کہا: جنگ حنین کے موقع پر۔ میں نے پوچھا: کیا آپ نے جنگ حنین میں شرکت کی ہے؟ انہوں نے کہا: جی ہاں (جنگ حنین میں بھی) اور اس سے پہلے کی (بھی کئی) جنگوں میں شریک ہوا ہوں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6572]

مجھ سے ابو الحسین علی بن عبدالرحمٰن الصبیعی نے بیان کیا، مجھ سے الحسین بن الحکم الحیری نے بیان کیا، انہوں نے کہا: میں نے ابو نعیم کو کہتے سنا: عبداللہ بن ابی اوفی کی وفات ستاسی یا اٹھاسی میں ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6573]

مجھ سے مخلد بن جعفر نے بیان کیا، ہم سے محمد بن جریر نے بیان کیا، انہوں نے کہا: "کہا گیا ہے کہ کوفہ میں رسول اللہ صلی اللہ علیہ وسلم کے آخری اصحاب کی وفات عبداللہ بن ابی اوفی کی ہوئی تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6574]