خلیفہ بن خیاط سے روایت ہے کہ: یزید بن ثابت بن ضحاک بن زید بن لوذان بن عمرو بن عوف بن غنم بن مالک بن نجار، ان کی اور ان کے بھائی سیدنا زید بن ثابت رضی اللہ عنہ کی والدہ نوار بنت مالک بن عدی بن عامر بن عدی بن نجار ہیں، انہوں نے غزوہ بدر میں شرکت کی اور جنگِ یمامہ کے دن جامِ شہادت نوش فرمایا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6646]

خارجہ بن زید بن ثابت اپنے چچا یزید بن ثابت رضی اللہ عنہ سے روایت کرتے ہیں کہ: وہ رسول اللہ صلی اللہ علیہ وسلم اور آپ کے صحابہ کے ساتھ تھے کہ ایک جنازہ نمودار ہوا، جب آپ صلی اللہ علیہ وسلم نے اسے دیکھا تو آپ صلی اللہ علیہ وسلم کھڑے ہو گئے اور آپ کے صحابہ بھی کھڑے ہو گئے، وہ سب اس وقت تک کھڑے رہے جب تک وہ جنازہ نظروں سے اوجھل نہ ہو گیا، اور میرا خیال ہے کہ وہ کوئی یہودی مرد یا عورت تھی (جس کا وہ جنازہ تھا)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6647]