خارجہ بن زید بن ثابت اپنے چچا یزید بن ثابت رضی اللہ عنہ سے روایت کرتے ہیں کہ: وہ لوگ ایک دن رسول اللہ صلی اللہ علیہ وسلم کے ہمراہ ایک جنازے کے لیے نکلے یہاں تک کہ بقیع پہنچے، آپ صلی اللہ علیہ وسلم نے (ایک نئی قبر دیکھ کر) دریافت فرمایا: ”یہ کیا ہے؟“ لوگوں نے عرض کی: یہ فلاں قبیلے کی فلاں آزاد کردہ لونڈی ہے، آپ صلی اللہ علیہ وسلم نے اسے پہچان لیا اور فرمایا: ”تم نے مجھے اس کے متعلق اطلاع کیوں نہ دی؟“ انہوں نے عرض کی: ہم نے اسے ظہر کے وقت دفن کیا تھا اور آپ اس وقت قیلولہ (آرام) فرما رہے تھے، اس لیے ہم نے آپ کو زحمت دینا پسند نہ کیا۔ پس آپ صلی اللہ علیہ وسلم کھڑے ہوئے اور لوگوں نے آپ کے پیچھے صفیں بنائیں، آپ صلی اللہ علیہ وسلم نے اس پر چار تکبیریں کہیں، پھر فرمایا: ”تم میں سے جب بھی کسی کا انتقال ہو تو مجھے ضرور اطلاع دیا کرو، کیونکہ میری نماز ان کے لیے رحمت ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6648]