سیدنا عمرو بن عاص رضی اللہ عنہ بیان کرتے ہیں کہ مجھے رسول اللہ صلی اللہ علیہ وسلم کے ایک صحابی نے خبر دی کہ انہوں نے رسول اللہ صلی اللہ علیہ وسلم کو یہ فرماتے ہوئے سنا: ”بے شک اللہ عزوجل نے تمہارے لیے ایک نماز کا اضافہ فرمایا ہے، پس تم اسے عشاء اور صبح کی نماز کے درمیان پڑھا کرو اور وہ وتر ہے۔“ اور وہ (خبر دینے والے) صحابی سیدنا ابو بصرہ غفاری رضی اللہ عنہ تھے۔ ابو تمیم کہتے ہیں کہ میں اور سیدنا ابوذر رضی اللہ عنہ بیٹھے ہوئے تھے، تو سیدنا ابوذر رضی اللہ عنہ نے میرا ہاتھ پکڑا اور ہم سیدنا ابو بصرہ رضی اللہ عنہ کے پاس گئے، ہم نے انہیں سیدنا عمرو بن عاص رضی اللہ عنہ کے گھر کے دروازے کے پاس پایا، تو سیدنا ابوذر رضی اللہ عنہ نے ان سے پوچھا: اے ابوبصرہ! کیا آپ نے رسول اللہ صلی اللہ علیہ وسلم کو یہ فرماتے ہوئے سنا ہے کہ: ”بے شک اللہ عزوجل نے تمہارے لیے ایک نماز کا اضافہ فرمایا ہے، پس تم اسے عشاء اور صبح کی نماز کے درمیان پڑھا کرو، وہ وتر ہے، وہ وتر ہے“؟ انہوں نے جواب دیا: جی ہاں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6658]

سیدنا بصرہ بن ابی بصرہ غفاری رضی اللہ عنہ سے روایت ہے کہ: میں نے ایک کنواری عورت سے نکاح کیا تو اسے حاملہ پایا، اس پر نبی کریم صلی اللہ علیہ وسلم نے ارشاد فرمایا: ”جہاں تک اس بچے کا تعلق ہے تو وہ تمہارا غلام ہو گا، اور جب وہ عورت بچے کو جنم دے لے تو اسے سو کوڑے لگاؤ، اور اسے مہر ملے گا کیونکہ تم نے اس کی شرمگاہ کو اپنے لیے حلال کیا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6659]